వారణాసి: ప్రధాని మోదీ (PM Modi) హ్యాట్రిక్పై కన్నేశారు. యూపీలోని వారణాసి (Varanasi) నుంచి రెండు పర్యాయాలు గెలుపొందిన మోదీ.. మూడోసారి విజయంపై గురిపెట్టారు. ఇందులో భాగంగా మంగళవారం వారణాసి లోక్సభ స్థానానికి నామినేషన్ సమర్పించనున్నారు. అత్యంత అట్టహాసంగా జరిగే ఈ కార్యక్రమానికి కేంద్రమంత్రులు, పార్టీ సినియర్ నేతలు, బీజేపీ పాలిత, మిత్రపక్షాల ముఖ్యమంత్రులతోపాటు ఎన్డీయే కూటమిలోని ప్రధాని పార్టీల నేతలు హాజరుకానున్నారు. దీంతో ఏర్పాట్లను కేంద్ర హోం మంత్రి అమిత్ షా, యూపీ ముఖ్యమంత్రి యోగి ఆదిత్యనాథ్ దగ్గరుండి పర్యవేక్షిస్తున్నారు.
కాగా వారణాసిలో లోక్సభ అభ్యర్థిగా మరోసారి పోటీచేస్తున్న నరేంద్ర మోదీ సోమవారం ఆరు కిలోమీటర్ల మేర ఆ పట్టణంలో భారీ రోడ్షో నిర్వహించారు. విద్యా రంగ సంస్కర్త మదన్మోహన్ మాలవీయా విగ్రహానికి పూలమాల సమర్పించి తన యాత్రను ఆయన ప్రారంభించారు. రోడ్షోలో ఆయన వెంట యూపీ సీఎం యోగీ ఆదిత్యనాథ్ ఉన్నారు. ప్రధానమంత్రికి ఆహ్వానం పలుకుతూ, కనీసం వంద చోట్ల స్వాగత తోరణాలు ఏర్పాటుచేశారు. కాషాయ దుస్తులు ధరించిన మహిళలు రోడ్డుకు అటు ఇటు పెద్దఎత్తున గుమిగూడి రోడ్షోకు స్వాగతం పలికారు. నరేంద్రమోదీపై పూలవర్షం కురిపించారు.
వారణాసిలో ప్రధాని మోదీ నామినేషన్ దాఖలు కార్యక్రమంలో బీహార్ సీఎం నితీశ్ కుమార్, ఉత్తరాఖండ్ ముఖ్యమంత్రి పుష్కర్ ధామి, మధ్యప్రదేశ్ సీఎం మోహన్ యాదవ్, ఛత్తీస్గఢ్ సీఎం విష్ణు దేవ్ సాయ్, మహా సీఎం ఏక్నాథ్ షిండే, రాజస్థాన్ సీఎం భజన్ లాల్ శర్మ, అస్సాం సీఎం హిమంత శర్మ, హర్యానా సీఎం నాయబ్ సైనీ, గోవా సీఎం ప్రమోద్ సావంత్, సిక్కి సీఎం ప్రేమ్ సింగ్ తమంగ్, త్రిపుర సీఎం మాణిక్ సాహా హాజరుకానున్నారు.