రాజమహేంద్రవరం: అవినీతిపరులు దోచుకున్న సొమ్మును తిరిగి పేదలకు ఇవ్వడం కోసం న్యాయ సలహా తీసుకుంటున్నానని ప్రధాని మోదీ చెప్పారు. ఆంధ్రప్రదేశ్లోని వేమగిరిలో జరిగిన ఎన్డీయే ఎన్నికల ప్రచార సభలో ఆయన మాట్లాడుతూ, జార్ఖండ్లోని ఓ వ్యక్తి ఇంటి నుంచి భారీగా నగదును ఈడీ అధికారులు స్వాధీనం చేసుకున్న విషయాన్ని ప్రస్తావించారు. జార్ఖండ్ మంత్రి వద్ద పని చేస్తున్న కార్యదర్శికి పని మనిషి ఇంట్లో ఈ నగదు దొరికింది. ఇటువంటి వ్యక్తులు కాంగ్రెస్ పార్టీలోని ప్రథమ కుటుంబం (గాంధీలు)తో ఎందుకు సన్నిహితంగా ఉంటున్నారోనని ఆశ్చర్యం వ్యక్తం చేశారు. కొండంత కరెన్సీ కట్టలు దొరుకుతున్నాయని, వాటిని లెక్కపెట్టలేక కరెన్సీ కౌంటింగ్ యంత్రాలు అలసిపోతున్నాయని అన్నారు. వర్కర్ల ఇళ్లను నల్లధనాన్ని దాచుకునే గోదాములుగా మార్చారని దుయ్యబట్టారు. ఇప్పటి వరకు ఈడీ రూ.1.25 లక్షల కోట్లు జప్తు చేసిందని, మిగిలిన కేంద్ర దర్యాప్తు సంస్థలు స్వాధీనం చేసుకున్న సొమ్మును కలిపితే ఇది మరింత పెరుగుతుందని చెప్పారు. ఈ సొమ్మును ఎవరి నుంచి దోచుకున్నారో వారికి తిరిగి ఎలా ఇవ్వాలనే అంశంపై న్యాయ సలహా తీసుకుంటున్నానని చెప్పారు. ఇప్పటికే రూ.17,000 కోట్లను నిజమైన యజమానులకు తిరిగి ఇచ్చామన్నారు.