PM Modi | న్యూఢిల్లీ, జూన్ 7: ఎన్డీయే పార్లమెంటరీ పార్టీ నేతగా ప్రధానమంత్రి నరేంద్ర మోదీ మరోసారి ఎన్నికయ్యారు. శుక్రవారం ఢిల్లీలో జరిగిన సమావేశంలో ఆయనను తమ నేతగా ఎన్డీయే భాగస్వామ్య పార్టీల ఎంపీలు ఎన్నుకున్నారు. ఈ సమావేశంలో మోదీ మాట్లాడుతూ.. తమకు ఈ ఒక్క ఎన్నికల్లో వచ్చినన్ని సీట్లు కాంగ్రెస్కు గత మూడు ఎన్నికల్లో కలిపినా రాలేదని ఎద్దేవా చేశారు. కాంగ్రెస్ పార్టీ ఇంకో పదేండ్లు అయినా 100 సీట్లు దాటదని చురకలంటించారు. ఎన్డీయే సాధించిన గె
లుపునకు గుర్తింపు లభించకుండా, ఓటమి భావనను కల్పించేందుకు ప్రతిపక్ష నేతలు ప్రయత్నిస్తున్నారని, ఈ ప్రయత్నాలు ఫలించవని అన్నారు. ఈ ఎన్నికల్లో తాము ఓడిపోలేదని చిన్నపిల్లాడికి కూడా తెలుసని, ఎన్డీయే నిన్న ఉందని, నేడు, రేపు కూడా ఉంటుందని అన్నారు.
సంఖ్యాపరంగా చూస్తే తమది సంకీర్ణాల చరిత్రలోనే బలమైన సంకీర్ణ ప్రభుత్వమని పేర్కొన్నారు. ప్రభుత్వాన్ని ఏర్పాటు చేయడానికి మెజార్టీ అవసరమని, దేశాన్ని నడిపించడానికి ఏకాభిప్రాయం ముఖ్యమని పేర్కొన్నారు. దేశ ప్రజలు తమకు ప్రభుత్వాన్ని నడిపించేందుకు మంచి మెజార్టీ ఇచ్చారని, దేశాన్ని ముందుకు తీసుకెళ్లేందుకు ఏకాభిప్రాయాన్ని సాధించేందుకు నిర్విరామంగా ప్రయత్నించే బాధ్యత తమదేనని అన్నారు. ఎన్డీయే అంటే న్యూ ఇండియా(కొత్త ఇండియా), డెవలప్డ్ ఇండియా(అభివృద్ధి చెందిన ఇండియా), యాస్పిరేషనల్ ఇండియా(ఆకాంక్షల ఇండియా) అని ఆయన కొత్త అర్థం చెప్పారు. గత పదేండ్ల తమ పాలన కేవలం ట్రైలర్ మాత్రమేనని, ఇప్పుడు దేశాభివృద్ధి కోసం మరింత వేగంగా, కష్టపడి పని చేస్తామన్నారు.
అంబేద్కర్ ఇచ్చిన భారత రాజ్యాంగంలోని గొప్ప విలువలను నిలబెట్టడం కోసం తన జీవితంలో ప్రతి క్షణం పని చేస్తానని ఆయన ‘ఎక్స్’లో పోస్ట్ చేశారు. రాజ్యాంగం వల్లనే పేదరికం, వెనుకబడిన కుటుంబంలో జన్మించిన తన లాంటి వ్యక్తి దేశానికి సేవ చేయగలుగుతున్నారని, మన రాజ్యాంగం కోట్లాది మందికి ఆశ, బలం, గౌరవాన్ని ఇచ్చాయని పేర్కొన్నారు.
ఎన్డీయే పార్లమెంటరీ పార్టీ నేతగా ఎన్నికైన తర్వాత ప్రధాని మోదీ.. బీజేపీ సీనియర్ నేతలు ఎల్కే అద్వానీ, మురళీ మనోహర్ జోషీని వారి నివాసాలకు వెళ్లి కలిసి ఆశీర్వాదం తీసుకున్నారు. మాజీ రాష్ట్రపతి రామ్నాథ్ కోవింద్ను సైతం ఆయన మర్యాదపూర్వకంగా కలిశారు.
ప్రధానమంత్రిగా మూడోసారి నరేంద్ర మోదీ ఆదివారం సాయంత్రం ప్రమాణస్వీకారం చేయనున్నారు. ఎన్డీయే పార్లమెంటరీ పార్టీ నేతగా మోదీ ఎన్నికైన తర్వాత ఆయన రాష్ట్రపతి ద్రౌపది ముర్మును కలిశారు. ఎన్డీయే ఎంపీల జాబితాను అందించారు. ఎన్డీయే నేతలు కూడా తమ మద్దతు తెలియజేస్తూ లేఖలు ఇచ్చారు. దీంతో ప్రభుత్వాన్ని ఏర్పాటు చేయాల్సిందిగా రాష్ట్రపతి ఆహ్వానించారు. రాష్ట్రపతి భవన్లో ఆదివారం సాయంత్రం 7.15 గంటలకు ప్రధాని సహా మంత్రులు ప్రమాణస్వీకారం చేస్తారని రాష్ట్రపతి భవన్ తెలిపింది.
ఈ మధ్యనే ఏర్పడ్డ తెలంగాణ, కర్ణాటక ప్రభుత్వాలు కొన్ని రోజుల్లోనే ప్రజల నమ్మకాన్ని కోల్పోయాయి. ఆ రాష్ర్టాల్లో ప్రజలు ఎన్డీయేను అంగీకరించారు. తమిళనాడులో బీజేపీ ఒక్క సీటు గెలవకపోయినా.. ఎన్డీయే ఓట్ల శాతం పెరిగింది. బీజేపీకి మొదటిసారి కేరళ నుంచి ఒక ఎంపీ ఉన్నారు.
– ఎన్డీయే భాగస్వామ్య పక్షాల భేటీలో మోదీ