వారణాసి, మే 14: ఉత్తరప్రదేశ్లోని వారణాసి లోక్సభ నియోజకవర్గ బీజేపీ అభ్యర్థిగా ప్రధాని మోదీ మంగళవారం నామినేషన్ వేశారు. ఈ కార్యక్రమానికి పలువురు కేంద్ర మంత్రులు, పలు రాష్ర్టాల సీఎంలతోపాటు ఎన్డీయే కూటమి నేతలు పాల్గొన్నారు. ప్రధాని మోదీ అంతకుముందు పలు పూజా కార్యక్రమాల్లో పాల్గొన్నారు. చారిత్రక వారణాసి ప్రజలకు సేవ చేయడం తనకు గొప్ప అదృష్టంగా భావిస్తున్నానని, ప్రజల ఆశీస్సులతో గత దశాబ్ద కాలంలో ఎన్నో విజయాలు సాధించామని మోదీ ఎక్స్లో పేర్కొన్నారు. మోదీ నామినేషన్ ప్రపోజర్లలో ఒక బ్రాహ్మిణ్, ఇద్దరు ఓబీసీ వర్గానికి చెందిన వాళ్లు, ఒక దళిత వ్యక్తి ఉన్నారు.
సొంత ఇల్లు, కారు లేని ప్రధాని
తనకు సొంత ఇల్లు, భూమి, వాహనం లేవని ప్రధాని మోదీ ప్రకటించారు. తనకు మొత్తం రూ.3.02 కోట్లు చరాస్థులు ఉన్నట్టు పేర్కొన్నారు. ఎన్నికల నామినేషన్ పత్రాల్లో స్థిరచరాస్థులు, ఆదాయ వివరాల్ని ప్రధాని వెల్లడించారు. వీటి ప్రకారం, ప్రధాని మోదీ మొత్తం స్థిరచరాస్థిలో అత్యధికభాగం రూ.2.89 కోట్లు ఎస్బీఐలో ఫిక్స్డ్ డిపాజిట్ల రూపంలో ఉంది. నగదు రూ.52,920 ఉందని తెలిపారు. రూ.2,89,45,598 ఫిక్స్డ్ డిపాజిట్ల (ఎస్బీఐ) రూపంలో ఉంది.
అలాగే నాలుగు బంగారు ఉంగరాలున్నాయని, వాటి విలువ రూ.2.67 లక్షలుగా చూపారు. 2018-19 నుంచి 2022-23 మధ్య ప్రధాని మోదీ వార్షిక ఆదాయం రెట్టింపు అయ్యింది. రూ.11 లక్షల నుంచి రూ.23.5లక్షలకు పెరిగింది. అంతేగాక, తనపై ఎలాంటి క్రిమినల్ కేసులూ లేవని, ఢిల్లీ యూనివర్సిటీ నుంచి డిగ్రీ, గుజరాత్ యూనివర్సిటీ నుంచి మాస్టర్ ఆఫ్ ఆర్ట్స్ పొందానని నామినేషన్ పత్రాల్లో పేర్కొన్నారు.