న్యూఢిల్లీ, డిసెంబర్ 13: రుణాలపై పరిమితి విధించడం వంటి చర్యల ద్వారా రాష్ర్టానికి సంబంధించిన ఆర్థిక వ్యవహారాల్లో కేంద్ర ప్రభుత్వం జోక్యం చేసుకొంటున్నదని ఆరోపిస్తూ కేరళ సర్కార్ సుప్రీంకోర్టులో తాజాగా పిటిషన్ వేసింది. రాజ్యాంగంలోని పలు నిబంధనల ప్రకారం సొంత ఆర్థిక వ్యవహారాల విషయంలో రాష్ట్ర ప్రభుత్వానికి అధికారాలు ఉంటాయని, అయితే ఈ అధికారాల్లో జోక్యం చేసుకొనేందుకు కేంద్రానికి ఎలాంటి అధికారం ఉన్నదనే ప్రశ్నలు లేవనెత్తింది. కేంద్ర ఆర్థిక శాఖ 2023 మార్చిలో జారీచేసిన లేఖలు, ఎఫ్ఆర్బీఎం చట్టంలోని సెక్షన్ 4కు సవరణలు చేయడం ద్వారా నికర రుణ పరిమితి విధించడం, నికర రుణ పరిమితిని తగ్గించడం వంటి చర్యలతో రాష్ట్ర ఆర్థిక వ్యవహారాల్లో జోక్యం చేసుకొన్నదని కేరళ ప్రభుత్వం తన పిటిషన్లో పేర్కొన్నది.
రుణాలు, బడ్జెట్ తయారీ, నిర్వహణ ద్వారా తన ఆర్థిక వ్యవహారాల నియంత్రణకు రాష్ర్టాలకు ప్రత్యేక అధికారాలు ఉంటాయని పేర్కొన్నది. రుణాల పరిమితిని తగ్గించడం వల్ల రాష్ర్టాలపై ప్రతికూల ప్రభావం చూపుతుందని అభిప్రాయపడింది. ‘రాష్ట్ర ప్రభుత్వ అప్పు’ అనేది రాజ్యాంగంలోని ఆర్టికల్ 246 కింద ఏడో షెడ్యూల్లోని రాష్ర్టాల జాబితాలో ఉన్నదని, అయితే కేంద్ర ప్రభుత్వం అసంబద్ధ సవరణల ద్వారా రాష్ర్టాల అధికారాల్లోకి చొరబడిందని ఆరోపించింది.