న్యూఢిల్లీ/పాట్నా/ఇంఫాల్, జూన్ 19: ఈశాన్య రాష్ట్రం మణిపూర్లో గత నెలన్నర రోజులుగా కొనసాగుతున్న హింసాకాండపై ప్రధాని మోదీ నోరు మెదపకపోవడంపై తీవ్ర విమర్శలు వస్తున్నాయి. మోదీ మౌనానికి నిరసనగా మణిపూర్ వాసులు ఆదివారం ఆయన ‘మన్కీ బాత్’ కార్యక్రమాన్ని బహిష్కరించారు. ఇంఫాల్ వెస్టు, కక్చింగ్ జిల్లాలోని పలు ప్రాంతాల్లో రేడియోలను రోడ్లపై పగులకొట్టి నిరసన వ్యక్తం చేశారు. ప్రధాని మోదీ తమ మన్కీ బాత్ వినాలని పౌరులు డిమాండ్ చేశారు. ప్రధాని మోదీకి వ్యతిరేకంగా పెద్దయెత్తున నినాదాలు చేశారు. “సిగ్గుపడండి మోదీజీ, మన్కీ బాత్లో మణిపూర్ గురించి ఒక్క మాట కూడా మాట్లాడలేదు’, ‘నో టు మన్కీ బాత్, యస్ టు మణిపూర్ కీ బాత్’, ‘మోదీజీ మన్కీబాత్ పేరుతో డ్రామాలొద్దు” అని రాసి ఉన్న ప్లకార్డులు ప్రదర్శించారు.
మండిపోతుంటే.. ఒక్క మాట మాట్లాడరా?
‘మన్కీ బాత్’ అంటూ ఊదరగొట్టే ప్రధాని మోదీ.. ‘మణిపూర్ కీ బాత్’ వినాలని, రాష్ట్రంలో శాంతియుత పరిస్థితులు నెలకొల్పాలని ప్రతిపక్షాలు డిమాండ్ చేశాయి. మణిపూర్ ఘర్షణలతో మండిపోతుంటే.. మోదీ విదేశీ పర్యటనలు చేస్తున్నారని కాంగ్రెస్ ప్రధాన కార్యదర్శి కేసీ వేణుగోపాల్ విమర్శించారు. హింసాకాండ మిజోరం రాష్ర్టానికి పాకుతున్నదని ఆందోళన వ్యక్తం చేశారు. వివాదం కొనసాగాలని ప్రధాని మోదీ, బీజేపీ కోరుకుంటున్నట్టు అనిపిస్తున్నదని ఆరోపించారు.
మణిపూర్పై ఎప్పుడు మాట్లాడుతారు?
మన్కీ బాత్లో మణిపూర్ అంశాన్ని ప్రస్తావించకపోవడాన్ని జేడీయూ జాతీయ అధ్యక్షుడు లలన్ సింగ్ ఖండించారు. డబుల్ ఇంజిన్ ప్రభుత్వమే ఉన్నప్పటికీ మణిపూర్ ఘర్షణలతో అట్టుడుకిపోతున్నదన్నారు. ఇంఫాల్ పశ్చిమలో సోమవారం ఆర్మీ జవాన్కు గాయాలయ్యాయి. చిన్మాంగ్లో దుండగులు మూడు ఇండ్లకు నిప్పు పెట్టారు.