(స్పెషల్ టాస్క్ బ్యూరో)
హైదరాబాద్ (నమస్తే తెలంగాణ): ప్రధాన్ మంత్రి గ్రామీణ సడక్ యోజన కింద వేస్తున్న రోడ్డు పనుల్లో నాణ్యత కొరవడిందని పార్లమెంటరీ కమిటీ అసంతృప్తి వ్యక్తం చేసింది. సబ్ కాంట్రాక్టర్ల ద్వారా రోడ్ల నిర్మాణ పనులు పూర్తి చేయిస్తుండటంతో పాటు, పనుల పూర్తిలో తీవ్ర జాప్యం ముఖ్య కారణాలుగా లోక్సభలో గ్రామీణాభివృధ్ధి, పంచాయతీరాజ్ స్టాండింగ్ కమిటీ సమర్పించిన రిపోర్టులో పేర్కొంది.
పీఎంజీఎస్వై కింద నిర్మించిన రోడ్ల నిర్మాణంలో చాలా చోట్ల నాసిరకం సామగ్రిని వాడటం తమ దృష్టికి వచ్చినట్టు కమిటీ పేర్కొంది. గుజరాత్, అస్సాం, హర్యానా, మహారాష్ట్ర, ఉత్తరాఖండ్, మధ్యప్రదేశ్ వంటి బీజేపీ పాలిత రాష్ర్టాలతో పాటు 24 రాష్ర్టాలు, కేంద్ర పాలిత ప్రాంతాల్లో పనులు నత్తనడకన సాగుతున్నాయని పేర్కొంది. పీఎంజీఎస్వైతో మహాత్మా గాంధీ జాతీయ గ్రామీణ ఉపాధి హామీ పథకాన్ని విలీనం చేయాలని సిఫార్సు చేసింది.