న్యూఢిల్లీ, జూలై 15: కశ్మీరీ పండిట్ల వలసల అంశాన్ని బీజేపీ దేశవ్యాప్తంగా హిందు వుల ఓట్లను పొందేందుకు ఉపయోగించుకొన్నదని కశ్మీరీ పండిట్లు ఆగ్రహం వ్యక్తం చేస్తున్నారు. ఇతర ప్రాంతాలకు వలస వెళ్లిపోయిన కశ్మీరీ పండిట్లపై బీజేపీ నేతృత్వంలోని కేంద్ర ప్రభుత్వం గత పదేండ్లుగా నిర్లక్ష్యం వహించిందని కశ్మీరీ పండిట్ల హక్కుల కోసం పోరాడే ‘పనున్ కశ్మీర్’ సంఘం మండిపడింది. ఆర్టికల్ 370ని రద్దు చేసినా, జమ్ముకశ్మీర్ను రెండు కేంద్ర పాలిత ప్రాంతాలుగా చేసినా బీజేపీ ప్రభుత్వం కశ్మీరీ పండిట్ల పట్ల ఉదాసీనత, పక్షపాతం చూపిందని ఆవేదన వ్యక్తం చేసింది.
పనున్ కశ్మీర్ చైర్మన్ అజయ్ చ్రుంగూ తాజాగా జమ్ములో మీడియాతో మాట్లాడుతూ ప్రతిపక్షాలపై నిందలు వేసేందుకు, దేశవ్యాప్తంగా హిందూ ఓట్లు పొందడం కోసం బీజేపీ నాయకత్వం పండిట్ల వలస అంశాన్ని ఉపయోగించుకొన్నదన్నారు. కశ్మీరీ పండిట్లను రెండో తరగతి పౌరులుగా బీజేపీ చూసిందని ఆరోపించారు. జమ్ము, కశ్మీర్లో ఉగ్రవాద, వేర్పాటువాద శక్తులు బలపడ్డాయని ఆందోళన వ్యక్తం చేశారు. కశ్మీరీ హిందువుల శాశ్వత పునరావాసం కోసం ఒక ప్రత్యేక కేంద్ర పాలిత ప్రాంతాన్ని ఏర్పాటు చేసే వరకు తమ పోరాటం కొనసాగుతుందన్నారు.