జైపూర్: భర్తను భార్య హత్య చేసింది. (Woman Kills Husband) దొంగలు దోపిడీకి పాల్పడి అతడ్ని హత్య చేసినట్లు నమ్మించేందుకు ప్రయత్నించింది. అయితే మరో వ్యక్తితో వివాహేతర సంబంధం నేపథ్యంలో భర్తను ఆమె చంపినట్లు దర్యాప్తులో పోలీసులు తెలుసుకున్నారు. చివరకు ఆ మహిళను అరెస్ట్ చేశారు. రాజస్థాన్లోని బుండి జిల్లాలో ఈ సంఘటన జరిగింది. ఆదివారం తెల్లవారుజామున కత్తి పోటు గాయాలు, రక్తం మరకలతో కూడిన 35 ఏళ్ల వ్యక్తి మృతదేహాన్ని అతడి ఇంట్లో పోలీసులు గుర్తించారు. ఆ ఇంట్లో వస్తువులన్నీ చెల్లాచెదురుగా పడి ఉన్నాయి. ఇంట్లోకి దొంగలు ప్రవేశించారని, తన భర్తపై కత్తితో దాడి చేసి అతడి చెవికి ఉన్న రింగులను చోరీ చేశారని భార్య అయిన 32 ఏళ్ల మమత పోలీసులకు చెప్పింది. దొంగల దాడిలో భర్త చనిపోయినట్లుగా నమ్మించేందుకు ఆమె ప్రయత్నించింది.
కాగా, పోస్ట్మార్టం తర్వాత మృతదేహాన్ని కుటుంబానికి అప్పగించారు. గుర్తు తెలియని వ్యక్తులపై హత్య కేసు నమోదు చేశారు. అయితే మృతుడి భార్య మమతను పోలీసులు అనుమానించారు. సమీప గ్రామంలోని మరో వ్యక్తితో ఆమెకు వివాహేతర సంబంధం ఉన్నట్లు దర్యాప్తులో తెలుసుకున్నారు.ఈ విషయంపై భార్యాభర్తల మధ్య తరుచుగా గొడవలు జరుగుతున్నట్లు గ్రహించారు. కొన్ని ఆధారాలతో ఆమెను గట్టిగా ప్రశ్నించారు. దీంతో భర్తను తానే చంపినట్లు భార్య ఒప్పుకుంది. ఈ నేపథ్యంలో మమతను పోలీసులు అరెస్ట్ చేశారు.