అహ్మదాబాద్: గుజరాత్లోని కచ్ తీరంలో భారీ స్థాయిలో డ్రగ్స్ను గుర్తించారు. ఒక చోట దాచిన కొకైన్ ప్యాకెట్లను పోలీసులు స్వాధీనం చేసుకున్నారు. (Cocaine Seized) అంతర్జాతీయ మార్కెట్లో ఈ డ్రగ్స్ విలువ రూ.130 కోట్లు ఉంటుందని తెలిపారు. బుధవారం తెల్లవారుజామున కచ్ జిల్లా గాంధీధామ్ పట్టణం సమీపంలోని క్రీక్ ప్రాంతంలో 13 కొకైన్ ప్యాకెట్లను పోలీసులు స్వాధీనం చేసుకున్నారు. పట్టుబడకుండా ఉండేందుకు సముద్ర తీరంలో ఈ డ్రగ్స్ను స్మగ్లర్లు దాచి ఉంటారని అనుమానిస్తున్నారు.
కాగా, ఇంత భారీ స్థాయిలో డ్రగ్స్ స్వాధీనం చేసుకోవడం ఎనిమిది నెలల్లో రెండోసారి అని జిల్లా ఎస్పీ తెలిపారు. యాంటీ టెర్రరిస్ట్ స్క్వాడ్ (ఏటీఎస్), స్పెషల్ ఆపరేషన్స్ గ్రూప్ సంయుక్త బృందం కలిసి వెళ్తుండగా కిలో బరువున్న 13 కొకైన్ ప్యాకెట్లను గుర్తించినట్లు చెప్పారు. ఈ సంఘటనపై కేసు నమోదు చేసి దర్యాప్తు చేస్తున్నట్లు వెల్లడించారు. మరోవైపు గత ఏడాది సెప్టెంబరులో 80 కొకైన్ ప్యాకెట్లను కచ్-ఈస్ట్ పోలీసులు స్వాధీనం చేసుకున్నారు. ఇదే ప్రాంతంలో గుర్తించిన కిలో బరువున్న 80 కొకైన్ ప్యాకెట్ల విలువ అంతర్జాతీయ మార్కెట్లో రూ. 800 కోట్లుగా పోలీసులు నాడు పేర్కొన్నారు.