NPS Vatsalya | న్యూఢిల్లీ, జూలై 23: బడ్జెట్లో ఆర్థిక శాఖ మంత్రి నిర్మలా సీతారామన్ ఎన్పీఎస్ వాత్సల్య పథకాన్ని పరిచయం చేశారు. చిన్నారుల కోసం దీర్ఘకాలిక పొదుపును పెంపొందించడమే లక్ష్యంగా ఈ మైనర్ పెన్షన్ స్కీంను తెచ్చినట్టు మంత్రి తన ప్రసంగంలో తెలియజేశారు. తమ పిల్లల కోసం తల్లిదండ్రులు లేదా వారి సంరక్షకులు ఎన్పీఎస్ వాత్సల్యలో చేరవచ్చని చెప్పారు.
భవిష్యత్తులో తమ పిల్లలకు ఆర్థికపరమైన భద్రతను కల్పించాలని యోచించే తల్లిదండ్రులు, కుటుంబాలే లక్ష్యంగా ఈ పథకాన్ని రూపొందించారు. ప్రస్తుత నేషనల్ పెన్షన్ సిస్టమ్ (ఎన్పీఎస్)లో భాగంగానే ఈ వాత్సల్య పథకాన్నీ కేంద్రం తీసుకొచ్చింది. ఎన్పీఎస్లోని ఇతర ప్లాన్ల తరహాలోనే ఇదీ ఉంటుంది. తమ చిన్నారుల రేపటి కోసం తల్లిదండ్రులు, వారి సంరక్షకులు ఖాతాలను తెరిచి, అందులో కొంత మొత్తాలను మదుపు చేసుకోవచ్చు.
పిల్లలకు 18 ఏండ్లు వచ్చాక, ఈ వాత్సల్య పథకాన్ని రెగ్యులర్ ఎన్పీఎస్ ఖాతాగా మార్చుకునే సౌకర్యం ఉన్నది. అలాగే నాన్-ఎన్పీఎస్ ప్లాన్గా కూడా మార్చుకోవచ్చని ఆర్థిక మంత్రి నిర్మలా సీతారామన్ చెప్పారు. రిటైర్మెంట్ నిధి ఏర్పాటుకు, క్రమపద్ధతిలో పొదుపు, పెట్టుబడులను అలవర్చుకోవడానికి ఈ పథకం దోహదం చేస్తుందన్న ఆశాభావాన్ని వ్యక్తం చేశారు. కాగా, స్టాక్స్, బాండ్లు తదితర మార్కెట్ ఆధారిత సాధనాల్లోకి ఎన్పీఎస్ నిధులు పెట్టుబడులుగా వెళ్తాయి. కాబట్టి ఇవి ఒకింత రిస్క్తో కూడుకున్న ఇన్వెస్ట్మెంట్స్గానే భావించాల్సి ఉంటుంది. అయినప్పటికీ ఫిక్స్డ్ డిపాజిట్ల (ఎఫ్డీ) వంటి సంప్రదాయ ఆదాయ మార్గాలతో పోల్చితే అధిక రాబడులను ఇస్తుండటం కలిసొచ్చే అంశం.
కొత్త పన్ను విధానంలో నేషనల్ పెన్షన్ స్కీంను మరింత ఆకర్షణీయంగా మార్చేందుకు ట్యాక్స్ డిడక్షన్ను 14 శాతానికి పెంచారు. కంపెనీల కంట్రిబ్యూషన్పై పన్ను కోతలను 10 శాతం నుంచి 14 శాతానికి తెస్తున్నట్టు మంత్రి చెప్పారు. ఉద్యోగులు, కంపెనీల యాజమాన్యాలకు పన్ను ప్రయోజనాలను పెంచేందుకే ఈ నిర్ణయమన్నారు.