న్యూఢిల్లీ: నీట్-యూజీ మెడికల్ ఎంట్రెన్స్ పరీక్ష పేపర్ లీకైనట్లు వస్తున్న ఆరోపణలను కేంద్ర విద్యాశాఖ మంత్రి ధర్మేంద్ర ప్రదాన్(Dharmendra Pradhan) కొట్టిపారేశారు. పేపర్ లీకేజీకి సంబంధించిన ఆధారాలు లేవని ఆయన వెల్లడించారు. నీట్-యూజీ పేపర్ లీక్పై ఆధారాలు లేవని, ఎన్టీఏలో అవినీతి జరిగిందన్న ఆరోపణలు నిజం కాదు అని, అది చాలా నమ్మకమైన సంస్థ అని మంత్రి ప్రదాన్ తెలిపారు. ఈ కేసులో సుప్రీంకోర్టు వాదనలు వింటోందని, కోర్టు ఇచ్చే తీర్పుకు కట్టుబడి ఉంటామని ఆయన పేర్కొన్నారు. ఏ ఒక్క విద్యార్థికి కూడా నష్టం జరగకుండా చూస్తామన్నారు. ఎంబీబీఎస్, బీడీఎస్ అడ్మిషన్ల కోసం నీట్-యూజీ రాసిన 1563 విద్యార్థులకు గ్రేస్ మార్క్లు ఇవ్వడాన్ని రద్దు చేస్తున్నట్లు సుప్రీంకోర్టుకు ఇవాళ కేంద్రం వెల్లడించింది. అయితే ఆ విద్యార్థులు జూన్ 23వ తేదీన మరోసారి పరీక్ష రాసేందుకు అనుమతి ఇవ్వనున్నట్లు కేంద్రం చెప్పింది. ఒకవేళ విద్యార్థులు పరీక్షను రాయడానికి విముఖంగా ఉంటే, అప్పుడు ముందు వచ్చిన మార్కులనే పరిగణలోకి తీసుకోనున్నట్లు కేంద్రం తెలిపింది.