PhonePe CEO | ప్రైవేట్ రంగంలో ఉద్యోగాల కల్పనలో స్థానికులకు రిజర్వేషన్లు కల్పించాలని కర్ణాటక రాష్ట్ర ప్రభుత్వం ప్రతిపాదించిన జాబ్ కోటా బిల్లుపై ప్రముఖ ఫిన్ టెక్ సంస్థ ఫోన్పే ఫౌండర్, సీఈఓ సమీర్ నిగమ్ చేసిన వ్యాఖ్యలు వివాదాస్పదం అయ్యాయి. దీంతో ఆయన స్పందించారు. భేషరతుగా కర్ణాటక వాసులకు క్షమాపణ చెబుతున్నట్లు ఆదివారం తెలిపారు. తనకు ఏనాడూ కర్ణాటకను కించపర్చాలన్న ఆలోచన, ఉద్దేశం లేదని స్పష్టం చేశారు. సమీర్ నిగమ్ వ్యాఖ్యల నేపథ్యంలో ఫోన్పేను బహిష్కరించాలని సోషల్ మీడియాలో పోస్టులు వెల్లువెత్తడంతో ఆయన దిగి వచ్చారు.
కర్ణాటక రాజధాని బెంగళూరు కేంద్రంగా ఫోన్పే కార్యకలాపాలు నిర్వహిస్తోంది. సమీర్ నిగం వ్యాఖ్యలు కర్ణాటక రాష్ట్రాన్ని, కన్నడిగులను కించపర్చడమేని సోషల్ మీడియాలో పోస్టులు వెల్లువెత్తాయి. దీంతో సమీర్ నిగం వ్యక్తిగత ప్రకటన చేస్తూ తనకు కర్ణాటక అంటే గౌరవం ఉందని, తనకు ఏ ఒక్కరినీ కించపర్చాలన్న ఉద్దేశం లేదని క్లారిఫికేషన్ ఇచ్చారు. ‘కర్ణాటకలోనే ఫోన్పే పుట్టింది. ఈ నగరంతో మా మూలాలు ఇమిడి ఉన్నందుకు మేం గర్విస్తున్నాం. వైవిధ్యభరితమైన అసాధారణ సాంకేతిక పరిజ్ఞానానికి పెట్టింది పేరు బెంగళూరు’ అని సమీర్ నిగమ్ పేర్కొన్నారు. తన వ్యాఖ్యల వల్ల ఎవరికైనా బాధ కలిగితే విచారం వ్యక్తం చేస్తున్నానని చెప్పారు. కన్నడంతోపాటు భారతీయ భాషల పట్ల తన గౌరవం ఉందని పునరుద్ఘాటించారు. ప్రస్తుతం జాబ్ కోటా బిల్లును కర్ణాటక రాష్ట్ర ప్రభుత్వం సస్పెన్షన్ ను పెట్టింది.