కోల్కతా, జూలై 21: బీజేపీ నేతృత్వంలోని ఎన్డీఏ ప్రభుత్వం కేంద్రంలో ఎక్కువకాలం అధికారంలో ఉండలేదని బెంగాల్ సీఎం, తృణమూల్ అధినేత్రి మమతాబెనర్జీ, సమాజ్వాదీ పార్టీ అధ్యక్షుడు అఖిలేశ్ యాదవ్ పేర్కొన్నారు. మతశక్తులకు తాత్కాలిక విజయం లభించినా అంతిమంగా అవి ఓటమి పాలవ్వక తప్పదని అఖిలేశ్ అన్నారు. బెంగాల్లో ఆదివారం మమత నేతృత్వంలో జరిగిన అమర వీరుల దినోత్సవ ర్యాలీలో ఆయన పాల్గొన్నారు.
ఈ సందర్భంగా మాట్లాడుతూ.. కేంద్రంలో బీజేపీ సర్కారు ఎంతోకాలం అధికారంలో కొనసాగలేదని, త్వరలోనే ఆ ప్రభుత్వం పడిపోతుందని అన్నారు. ఎలాగైనా అధికారంలోనే ఉండాలని అలాంటి మతశక్తులు భావిస్తాయని, కాని వారు అందులో వారు విజయం సాధించలేరని అన్నారు. బీజేపీ కేంద్ర దర్యాప్తు సంస్థలను ఎలా దుర్వినియోగం చేసి అధికారంలోకి వచ్చిందో అందరికీ తెలుసని, అయితే ఎన్డీఏ ప్రభుత్వం పూర్తికాలం అధికారంలో ఉండలేదని మమతా బెనర్జీ అన్నారు. ఇటీవలి లోక్సభ ఎన్నికల్లో యూపీలో బీజేపీని మట్టి కరిపించిన అఖిలేశ్ యాదవ్ను ఆమె ప్రశంసించారు.