న్యూఢిల్లీ : నేషనల్ డెమోక్రటిక్ అసోసియేషన్(ఎన్డీఏ) వరుసగా మూడవ సారి అధికారాన్ని చేపట్టబోతున్నది. 18వ లోక్సభ ఎన్నికల్లో(Lok Sabha Polls) ఎన్డీఏ కూటమి .. మ్యాజిక్ మార్క్ను దాటేసింది. బీజేపీ నేతృత్వంలోని ఆ కూటమి తాజా సమాచారం ప్రకారం 296 స్థానాల్లో లీడింగ్లో ఉన్నది. ఎన్నికల సంఘం వెబ్సైట్ ప్రకారం ప్రస్తుతం బీజేపీ 242 స్థానాల్లో ఆధిక్యంలో కొనసాగుతున్నది. ఇండియా కూటమి 228 స్థానాల్లో లీడింగ్లో ఉంది. దీంట్లో కాంగ్రెస్ పార్టీ 94 స్థానాల్లో ఆధిక్యంలో ఉన్నది. అయితే 2019లో ఒంటరిగా 303 సీట్లు గెలిచిన బీజేపీ.. ఈసారి తక్కువ సీట్లతోనే సరిపెట్టుకున్నది. కానీ యూపీలో ఊహించని రీతిలో సమాజ్వాదీ పార్టీ పుంజుకున్నది. ఆ పార్టీకి తాజా సమాచారం ప్రకారం 36 సీట్లు దక్కాయి. ఇక బెంగాల్లో కూడా బీజేపీకి దెబ్బ తగిలింది. ఆ రాష్ట్రంలో తృణమూల్ పార్టీ 31 స్థానాల్లో లీడింగ్లో ఉన్నది.
యూపీ అందరి అంచనాలను తలకిందులు చేసింది. 2014లో ఆ రాష్ట్రంలో బీజేపీ క్లీన్ స్వీప్ చేసింది. 2019లో దాదాపు చాలా స్థానాలను నిలబెట్టుకున్నది. కానీ 2024లో మాత్రం .. సమాజ్వాదీ పార్టీ అనూహ్య రీతిలో సత్తా చాటింది. 80 స్థానాలు ఉన్న ఆ రాష్ట్రంలో తాజా సమాచారం ప్రకారం.. ఎస్పీ 35, బీజేపీ 34, కాంగ్రెస్ ఏడు స్థానాల్లో లీడింగ్లో ఉన్నాయి.
హోరాహోరీ పోరు ఉంటుందనుకున్న బెంగాల్లో బీజేపీకి షాక్ తగిలింది. ఆ రాష్ట్రంలో గత ఎన్నికల్లో 18 సీట్లు గెలిచిన ఆ పార్టీ ఈసారి 10 సీట్లలోనే లీడింగ్లో ఉన్నది. తృణమూల్ 31 సీట్లలో ఆధిక్యంలో ఉన్నది.
గత లోక్సభ ఎన్నికల్లో 52 సీట్లు మాత్రమే గెలిచిన కాంగ్రెస్ పార్టీ.. ఈ సారి సెంచరీ కొట్టబోతున్నది. తాజా సమాచారం ప్రకారం కాంగ్రెస్ పార్టీ 99 స్థానాల్లో లీడింగ్లో ఉన్నది. ప్రాంతీయ పార్టీలైన సమాజ్వాదీ, తృణమూల్, డీఎంకే, టీడీపీ, జేడీయూ చాలా సీట్లను గెలవబోతున్నాయి. ఇక శివసేన థాకరే, ఎన్సీపీ, లోక్జనశక్తి, శివసేన ఎస్హెచ్ఎస్ పార్టీలు పలు స్థానాల్లో ఆధిక్యంలో ఉన్నాయి.