న్యూఢిల్లీ : నేషనల్ హెరాల్డ్ కార్యాలయానికి ఈడీ సీల్ వేసిన అనంతరం కాంగ్రెస్ నేత మల్లికార్జున్ ఖర్గే గురువారం దర్యాప్తు ఏజెన్సీ కార్యాలయానికి చేరుకున్నారు. పార్లమెంట్ సమావేశాల సమయంలో విచారణకు హాజరు కావాల్సిందిగా ఖర్గేకు ఈడీ సమన్లు జారీ చేసింది.
ఢిల్లీలో కాంగ్రెస్కు చెందిన నేషనల్ హెరాల్డ్ కార్యాలయ భవనంలో యంగ్ ఇండియన్ ప్రైవేట్ లిమిటెడ్ కార్యాలయానికి ఈడీ అధికారులు బుధవారం సీల్ వేసిన సంగతి తెలిసిందే. కార్యాలయంలో సోదాల సందర్భంగా అక్కడికి మల్లికార్జున్ ఖర్గే వచ్చినా ఆపై వెనుదిరగడంతో కార్యాలయానికి సీల్ వేశామని ఈడీ అధికారులు చెప్పారు.
కాగా, నేషనల్ హెరాల్డ్ కేసులో ఈడీ దర్యాప్తు బీజేపీ అణిచివేత ఎత్తుగడల్లో భాగమని, కాషాయ పార్టీకి తాము భయపడబోమని కాంగ్రెస్ ఎంపీ రాహుల్ గాంధీ స్పష్టం చేశారు. బీజేపీ ఏం చేసినా తాము బెదిరేది లేదని అన్నారు. దేశాన్ని, ప్రజాస్వామ్యాన్ని కాపాడుకునేందుకు తన పోరాటం కొనసాగుతుందని గురువారం పేర్కొన్నారు. తమపై ఒత్తిడి తీసుకువస్తే మౌనం దాల్చుతామని కాషాయ పాలకులు అనుకుంటున్నారని, తాము మౌనం దాల్చబోమని బీజేపీ దుర్నీతిని ఎండగడుతూనే ఉంటామని అన్నారు.