భువనేశ్వర్: ఇటీవల కార్పొరేట్ ప్రపంచంలో పాపులర్ అయిన పదం మూన్లైటింగ్. అంటే ప్రధాన ఉద్యోగంతోపాటు ఖాళీ సమయాల్లో మరో పనిచేయడం. అయితే, ఇదే మూన్లైంటింగ్ను ఓ మంచి కార్యానికి ఉపయోగిస్తున్నాడు ఒడిశాలోని గంజాం జిల్లాకు చెందిన సీహెచ్ నగేశు పాత్రో. ప్రైవేట్ కాలేజీలో గెస్ట్ లెక్చరర్ అయిన నగేశు పాత్రో (31) నిరుపేద పిల్లలకు ఉచితంగా విద్యాబోధన అందించేందుకు రైల్వే కూలీ అవతారం ఎత్తారు. పగలు అతిథి అధ్యాపకుడిగా పనిచేస్తూనే బరంపూర్ రైల్వే స్టేషన్లో రాత్రి రైల్వే కూలీగా పనిచేస్తున్నారు. మూన్లైటింగ్ ద్వారా వచ్చిన డబ్బులతో పేదపిల్లలకు ట్యూషన్ చెప్పే టీచర్లకు జీతాలు చెల్లిస్తున్నారు. కొవిడ్ సమయంలో ఖాళీగా ఉండే బదులు పేదపిల్లలకు ఉచిత విద్య అందించాలని ట్యూషన్ ప్రారంభించారు. క్రమంగా పిల్లల సంఖ్య పెరగడంతో ఎనిమిదో తరగతి నుంచి 12వ తరగతి వరకు విద్యార్థులకు ప్రత్యేక కోచింగ్ సెంటర్ను తెరిచారు. స్వయంగా హిందీ, ఒడియా బోధిస్తున్నారు. మిగిలిన సబ్జెక్టులు బోధించేందుకు టీచర్లను నియమించారు. ప్రస్తుతం ఆయన దగ్గర పనిచేస్తున్న నలుగురు అధ్యాపకులకు రూ.10 వేల నుంచి రూ.12వేలు చెల్లిస్తున్నారు.