జైపూర్: పోలీస్ కస్టడీలో ఉన్న ఒక వ్యక్తి మరణించాడు. పోలీసులు కొట్టి చంపారన్న ఆరోపణలతో మృతదేహాన్ని తీసుకునేందుకు కుటుంబ సభ్యులు నిరాకరించారు. ఈ నేపథ్యంలో ఎనిమిది మంది పోలీసులపై హత్య కేసు నమోదు చేశారు. (Murder Case Against Police) రాజస్థాన్లోని జుంజును జిల్లాలో ఈ సంఘటన జరిగింది. మాండ్రేలా పోలీస్ స్టేషన్లో అత్యాచారం కేసు నమోదైంది. మే 24న కోట్పుట్లీకు చెందిన నిందితుడైన 30 ఏళ్ల గౌరవ్ శర్మను జైపూర్లో పోలీసులు అరెస్ట్ చేశారు. మరుసటి రోజు అతడ్ని కోర్టులో ప్రవేశపెట్టగా ఐదు రోజులు పోలీస్ రిమాండ్కు అప్పగించింది.
కాగా, మే 29న పోలీస్ కస్టడీలో ఉన్న గౌరవ్ శర్మ ఆరోగ్యం క్షిణించింది. దీంతో హాస్పిటల్కు తరలించగా అతడు అప్పటికే మరణించినట్లు డాక్టర్లు తెలిపారు. అయితే గౌరవ్ శర్మను పోలీసులు కస్టడీలో కొట్టి చంపారని అతడి కుటుంబ సభ్యులు ఆరోపించారు. పోలీసులపై హత్య కేసు నమోదు చేయాలని డిమాండ్ చేశారు. మృతదేహాన్ని తీసుకునేందుకు నిరాకరించారు.
మరోవైపు గౌరవ్ శర్మ కస్టడీ డెత్పై పోలీస్ ఉన్నతాధికారులు దర్యాప్తు చేశారు. ఎస్హెచ్వో రవీంద్ర కుమార్ను సస్పెండ్ చేశారు. ఆదివారం రాత్రి మృతుడి కుటుంబ సభ్యులతో పోలీస్ ఉన్నతాధికారులు మాట్లాడారు. ఎస్హెచ్వో రవీంద్ర కుమార్తో సహా ఎనిమిది మంది పోలీసులపై హత్య కేసు నమోదు చేశారు. నాలుగు రోజులుగా మార్చురీలో ఉంచిన గౌరవ్ శర్మ మృతదేహానికి పోస్ట్మార్టం తర్వాత అతడి కుటుంబ సభ్యులకు పోలీసులు అప్పగించారు. అతడి కస్టడీ మృతిపై దర్యాప్తు చేస్తున్నారు.