న్యూఢిల్లీ, జూలై 23: వ్యాపారవేత్తలుగా తీర్చిదిద్దాలనే ఉద్దేశంతో పదేండ్ల క్రితం కేంద్ర ప్రభుత్వం ప్రకటించిన ముద్రా రుణాల పరిమితిని రెట్టింపు చేసింది. గతంలో రూ.10 లక్షల వరకు రుణం ఇవ్వనుండగా, ప్రస్తుతం దీనిని రూ.20 లక్షల వరకు పెంచుతూ ప్రస్తుత ఆర్థిక సంవత్సరానికి ప్రవేశపెట్టిన సార్వత్రిక బడ్జెట్లో నిర్ణయం తీసుకున్నది. దీంతో నిధులు లేక సతమతమవుతున్న చిన్న, మధ్య స్థాయి సంస్థలకు భారీ ఊరట లభించినట్లు అవనున్నది.
కార్పొరేటేతర, వ్యవసాయేతర చిన్న-మధ్యస్థాయి వ్యాపారవేత్తలకు ఆదాయ మార్గాలు చూపించాలనే ఉద్దేశంతో ఏప్రిల్ 8, 2015లో ప్రధాన మంత్రి ముద్రా యోజన(పీఎంఎంవై) స్కీంను ప్రవేశపెట్టిన విషయం తెలిసిందే. మూడు విభాగాల్లో శిశు(రూ.50 వేల వరకు), కిశోర్(రూ.50 వేల నుంచి రూ.5 లక్షల వరకు), తరుణ్(రూ.10 లక్షలు) రుణాలు ఇచ్చారు. మరోవైపు, ఎంఎస్ఎంఈ క్లస్టర్లో సంస్థలకు నేరుగా రుణాలు ఇవ్వడానికి సిడ్బీ ఈ ఏడాది 24 నూతన శాఖలను ప్రారంభించనున్నట్లు మంత్రి ప్రకటించారు.