న్యూఢిల్లీ: నరేంద్ర మోదీ ప్రధాని పదవికి రాజీనామా చేశారు. (Modi resigns as PM) రాష్ట్రపతి ద్రౌపది ముర్మును కలిసి రాజీనామా పత్రాన్ని సమర్పించారు. దీనిని ఆమె ఆమోదించారు. కొత్త ప్రభుత్వం అధికారంలోకి వచ్చే వరకు ప్రధాని పదవిలో కొనసాగాలని మోదీని కోరారు. జూన్ 8న శనివారం మూడోసారి ప్రధానమంత్రిగా మోదీ ప్రమాణ స్వీకారం చేయనున్నట్లు తెలుస్తున్నది. మాజీ ప్రధాని జవహర్లాల్ నెహ్రూ తర్వాత మూడోసారి ప్రధాని పదవిని చేపట్టిన నేతగా మోదీ నిలువనున్నారు.
కాగా, బుధవారం ఉదయం ప్రధాని మోదీ నివాసంలో కేంద్ర మంత్రివర్గ చివరి సమావేశం జరిగింది. లోక్సభ ఎన్నికల ఫలితాలు, కొత్త ప్రభుత్వం ఏర్పాటుపై మంత్రులతో ఆయన చర్చించారు. అనంతరం 17వ లోక్సభను రద్దు చేస్తూ కేంద్ర మంత్రివర్గం నిర్ణయం తీసుకుంది.
మరోవైపు ఈ లోక్సభ ఎన్నికల ఫలితాల్లో బీజేపీ 240 సీట్లు మాత్రమే సాధించింది. ప్రభుత్వం ఏర్పాటుకు కావాల్సిన మెజారిటీ మార్కు 272. దీంతో జేడీయూ, టీడీపీ, ఇతర పార్టీల భాగస్వామ్యంతో కేంద్రంలో సంకీర్ణ ప్రభుత్వం ఏర్పాటు చేసేందుకు ఎన్డీయే సిద్ధమైంది. ఈ నేపథ్యంలో బుధవారం సాయంత్రం 4 గంటలకు జరిగే ఎన్డీయే కూటమి సమావేశానికి పలు పార్టీల సీనియర్ నేతలు ఢిల్లీ చేరుకుంటున్నారు.