హైదరాబాద్, జూన్ 25 (స్పెషల్ టాస్క్ బ్యూరో, నమస్తే తెలంగాణ): బీఆర్ఎస్ ఎమ్మెల్యే డాక్టర్ సంజయ్ కుమార్ను కాంగ్రెస్ పార్టీలో చేర్చుకోవడంపై ఎమ్మెల్సీ జీవన్రెడ్డి అసహనంతో ఉన్నారు. ఎన్నికల మ్యానిఫెస్టోలో పొందుపరిచిన ‘పాంచ్ న్యాయ్’ నియమాలకు విరుద్ధంగా కాంగ్రెస్ ప్రవర్తిస్తున్నదని మండిపడ్డారు. కాంగ్రెస్ ఎన్నికల మ్యానిఫెస్టో ‘పాంచ్ న్యాయ్’పై ఇప్పుడు సర్వత్రా చర్చ జరుగుతున్నది.
లోక్సభ ఎన్నికలకు ముందు కాం గ్రెస్ ‘పాంచ్ న్యాయ్’ పేరిట మ్యానిఫెస్టోను విడుదల చేసింది.‘పాంచ్ న్యా య్’ కింద సామాజిక ఆర్థిక కులగణన హామీతోపాటు యువత, మహిళలు, రైతులు, కార్మికులు తదితర వర్గాలకు వరాలు కురిపించింది. ఈ ‘పాంచ్ న్యాయ్’లోనే రాజ్యాంగ సమర్థన అనే ప్రత్యేక అంశాన్ని జోడించిన కాంగ్రెస్.. అందులో 13వ అంశంగా ఫిరాయింపుదారులపై వేటుకు సంబంధించి ప్రత్యేక హామీనిచ్చింది.
దాని ప్రకారం.. ‘ఒక పార్టీ టికెట్పై గెలిచిన సభ్యుడు (ఎమ్మెల్యే లేదా ఎంపీ), మరో పార్టీలోకి చేరితే, ఆ సభ్యుడి చట్టసభ సభ్యత్వాన్ని ఆటోమేటిక్గా రద్దు చేసే విధం గా చట్టాన్ని తీసుకొస్తాం. రాజ్యాంగంలోని పదో షెడ్యూల్లో అవసరమైన సవరణలు తీసుకొస్తాం’ అని కాంగ్రెస్ మ్యానిఫెస్టోలో హామీనిచ్చింది. క్షేత్రస్థాయిలో ఆ హామీని అటకెక్కించి.. ఫిరాయింపుదారులను ప్రోత్సహిస్తుండటం పై విమర్శలు వ్యక్తమవుతున్నాయి.