న్యూఢిల్లీ, జూలై 23: కొత్త బడ్జెట్లో కేంద్రం భారతీయ రైల్వేకు రూ.2.62 లక్షల కోట్లు కేటాయించింది. రైల్వే అనే పదాన్ని ఆర్థిక మంత్రి నిర్మలా సీతారామన్ తన 83 నిమిషాల బడ్జెట్ ప్రసంగంలో ఒక్కసారి మాత్రమే పలకడం గమనార్హం. రైల్వే శాఖ మంత్రి అశ్విని వైష్ణవ్ మీడియాతో మాట్లాడుతూ ఇంతటి భారీ కేటాయింపులు గతంలో ఎన్నడూ జరగలేదన్నారు. మొత్తం కేటాయింపుల్లో రూ.1.08 లక్షల కోట్ల నిధులను రైల్వే భద్రత వ్యవస్థల మెరుగు, రైల్వే మార్గాల్లో కవచ్ వ్యవస్థ ఇన్స్టాలేషన్కు వినియోగించనున్నట్టు తెలిపారు. ఆటోమేటిక్ ట్రైన్ ప్రొటెక్షన్ వ్యవస్థ ‘కవచ్’ ఇన్స్టాలేషనే తమ ప్రభుత్వ ప్రథమ ప్రాధాన్యతల్లో ఒకటని చెప్పారు. రైల్వే భద్రతా చర్యల్లో భాగంగా పాత ట్రాకుల స్థానంలో కొత్తవి ఏర్పాటు చేస్తామని, అదేవిధంగా సిగ్నలింగ్ వ్యవస్థ మెరుగుపరుస్తామని, రైల్వే ఓవర్, అండర్ పాస్ బ్రిడ్జిలను నిర్మిస్తామని, కవచ్ వ్యవస్థను ఇన్స్టాల్ చేస్తామని అశ్విని వైష్ణవ్ తెలిపారు. కవచ్ 4.0 ఇటీవలిని ఆమోదం పొందిందని, ఇన్స్టాలేషన్ను త్వరితగతిన చేపడుతామని పేర్కొన్నారు.
కేంద్ర బడ్జెట్లో తెలంగాణకు కొత్త రైల్వే ప్రాజెక్టులు, కాజీపేట్ రైల్వే కోచ్ ఫ్యాక్టరీ ఊసే లేకుండాపోయిందని ఎస్సీఆర్ ఎంప్లాయీస్ మజ్దూర్ యూనియన్ ప్రధాన కార్యదర్శి శంకర్రావు అభిప్రాయపడ్డారు. రైల్వే ప్రాజెక్టుల విషయంలో తెలంగాణ ప్రాంతానికి తీవ్ర అన్యాయం జరిగిందని మండిపడ్డారు. రైల్వే అభివృద్ధికి దాదాపు 3,00,000 ఉద్యోగాల భర్తీకి పోస్టులు మంజూరు కావాల్సి ఉన్నదని, కేంద్ర బడ్జెట్లో అలాంటి ప్రస్తావన ఏదీ లేకుండాపోయిందని విమర్శించారు. కేంద్ర ప్రభుత్వ ఉద్యోగులకు, రైల్వే ఉద్యోగులకు సంబంధించిన 8వ వేతన సంఘం ప్రస్తావన కూడా బడ్జెట్లో లేకుండా పోయిందని ఆవేదన వ్యక్తంచేశారు.