బెంగళూరు: చిన్నారికి అత్యవసర చికిత్స కోసం వేగంగా వెళ్తున్న అంబులెన్స్ ఒక వాహనాన్ని ఓవర్ టేక్ చేసింది. దీంతో ఆ కారులో ఉన్న వ్యక్తులు అంబులెన్స్ను ఫాలో అయ్యారు. టోల్ప్లాజా వద్ద అడ్డుకున్నారు. అంబులెన్స్ డ్రైవర్ను కొట్టారు. (attack on ambulance driver) పసిపాపను ఎమర్జెన్సీగా ఆసుపత్రికి తీసుకెళ్తున్నామని, వదిలిపెట్టాలని తల్లిదండ్రులు మొరపెట్టుకున్నప్పటికీ వారు కనికరించలేదు. కర్ణాటక రాజధాని బెంగళూరులో ఈ సంఘటన జరిగింది. ఆదివారం రాత్రి తీవ్ర అస్వస్థతకు గురైన ఐదు నెలల పసి పాపను ఆక్సిజన్ సపోర్ట్తో తుమకూరులోని ఓ ప్రైవేట్ ఆస్పత్రి నుంచి బెంగళూరులోని వాణి విలాస్ హాస్పిటల్కు అంబులెన్స్లో తరలిస్తున్నారు. చిన్నారికి అత్యవసర వైద్యం అవసరం కావడంతో డ్రైవర్ జాన్ అంబులెన్స్ను వేగంగా నడిపాడు. ఈ క్రమంలో ఇన్నోవా కారును ఓవర్టేక్ చేశాడు.
కాగా, ఆ కారులో ఉన్న వ్యక్తులు తమ వాహనాన్ని ఓవర్టేక్ చేయడంపై ఆగ్రహించారు. సుమారు ఆరు కిలోమీటర్ల వరకు అంబులెన్స్ను అనుసరించారు. నెలమంగళ టోల్ ప్లాజా వద్ద అంబులెన్స్ను ఓవర్టేక్ చేసి అడ్డుకున్నారు. అంబులెన్స్ డ్రైవర్ను కొట్టారు. తమ పాప పరిస్థితి సీరియస్గా ఉందని అంబులెన్స్ వెళ్లేందుకు అనుమతించాలని చిన్నారి పేరెంట్స్ చేతులు జోడించి వారిని వేడుకున్నారు. అయినప్పటికీ పట్టించుకోని ఆ వ్యక్తులు అంబులెన్స్ డ్రైవర్పై దాడిని కొనసాగించారు. చివరకు పోలీసుల జోక్యంతో అంబులెన్స్ను విడిచిపెట్టారు.
మరోవైపు ఆ సమయంలో ఆ ప్రాంతంలో ఉన్న కొందరు వ్యక్తులు ఈ సంఘటనను తమ మొబైల్ ఫోన్లో రికార్డ్ చేశారు. దీంతో ఈ వీడియో క్లిప్ సోషల్ మీడియాలో వైరల్ అయ్యింది. ఈ నేపథ్యంలో పోలీసులు స్పందించారు. ఈ సంఘటనపై కేసు నమోదు చేశారు. అంబులెన్స్ డ్రైవర్పై దాడి చేసిన నలుగురిని అరెస్ట్ చేశారు. ఆ సమయంలో వారు మద్యం సేవించారన్న ఆరోపణలపై దర్యాప్తు చేస్తున్నారు.