Kangana Ranaut : కాంగ్రెస్ పార్టీ అగ్ర నేత రాహుల్గాంధీపై బీజేపీ నాయకురాలు, మండీ లోక్సభ అభ్యర్థి కంగనా రనౌత్ సెటైర్ వేశారు. లోక్సభ ఎన్నికల ప్రచారంలో భాగంగా ఇవాళ మండి జిల్లాలోని భీమకాళీ ఆలయం పరిసరాల్లో బీజేపీ సమావేశం ఏర్పాటు చేసింది. ఈ సమావేశానికి వచ్చిన కంగనా రనౌత్ మీడియాతో మాట్లాడుతూ.. రాహుల్గాంధీపై సెటైరికల్ కామెంట్స్ చేశారు.
దేశంలో ప్రజాస్వామ్యం హత్యకు గురైందని రాహుల్గాంధీ చేసిన వ్యాఖ్యలను కంగనా రనౌత్ ముందు ప్రస్తావించడంతో ఆమె పైవిధంగా స్పందించారు. ‘దేశంలో ప్రజాస్వామ్యం హత్యకు గురైతున్నట్లయితే.. ఇప్పుడు మనమంతా దేనికి సిద్ధమవుతున్నాం..? ఎందుకు ప్రజలను ఆకర్షిస్తున్నాం..? ఎందుకు వారి మద్దతు కోరుతున్నాం..? మనం ప్రజల నమ్మకం, మద్దతు, సహకారం కోరుకుంటున్నాం. ఇదంతా ప్రజాస్వామ్యాన్ని హత్య చేయడమేనా..?’ అని కంగనా ప్రశ్నించారు.
ప్రజాస్వామ్యం హత్యకు గురైతే ప్రజలకు మద్దతుతో పని ఉండదని వ్యాఖ్యానించారు. ‘మనం ప్రజల మద్దతు కోరుతున్నమంటే .. దాన్ని ప్రజాస్వామ్యాన్ని కూనీ చేయడం అనరు. అసలు ప్రజాస్వామ్యం అంటేనే ఇది. బహుశా రాహుల్ గాంధీకి ప్రజాస్వామ్యం అనే పదానికి అర్థం తెలియదేమో..’ అని కంగనా సెటైరికల్ కామెంట్ చేశారు.