పాట్నా: ఒక వ్యక్తి, అతడి ఇద్దరు కుమార్తెలను ఒక అమ్మాయి ప్రియుడు కత్తితో పొడిచి హత్య చేశాడు. (Stabbed To Death) కుమార్తెల తల్లి కూడా ఈ దాడిలో తీవ్రంగా గాయపడింది. ముగ్గురి హత్యలకు సంబంధించి ఇద్దరు నిందితులను పోలీసులు అరెస్ట్ చేశారు. బీహార్లోని సరన్ జిల్లాలో ఈ సంఘటన జరిగింది. మంగళవారం రాత్రి ధనాదిహ్ గ్రామానికి చెందిన తారకేశ్వర్ సింగ్ అలియాస్ జబర్ సింగ్, అతడి భార్య, ఇద్దరు మైనర్ కుమార్తెలపై ఇద్దరు వ్యక్తులు కత్తులతో దాడి చేసి పొడిచారు. ఈ దాడిలో తారకేశ్వర్, అతడి ఇద్దరు కుమార్తెలు మరణించారు.
కాగా, ఈ విషయం తెలుసుకున్న పోలీసులు వెంటనే ఆ ఇంటికి చేరుకున్నారు. తీవ్రంగా గాయపడిన తారకేశ్వర్ సింగ్ భార్యను ఆసుపత్రికి తరలించారు. ఆమె ఫిర్యాదు ఆధారంగా కత్తులతో దాడి చేసిన రసూల్పూర్కు చెందిన ఇద్దరు నిందితులు సుధాన్షు కుమార్ అలియాస్ రోషన్, అంకిత్ కుమార్ను అరెస్ట్ చేసినట్లు పోలీసులు తెలిపారు. తారకేశ్వర్ సింగ్ ఒక కుమార్తె , సుధాన్షు కుమార్ మధ్య ప్రేమ వ్యవహారం వల్లే ఈ మూడు హత్యలు జరిగాయని వెల్లడించారు.