ముంబై : దివాళీ వేడుకల నేపధ్యంలో మహారాష్ట్రలోని థానేలో నివాస సముదాయాలపైకి రాకెట్లు విసిరిన వ్యక్తిపై పోలీసులు కేసు నమోదు చేశారు. ఈ ఘటనకు సంబంధించిన వీడియోలో గుర్తుతెలియని యువకుడు రెసిడెన్షియల్ బిల్డింగ్పైకి రాకెట్లను కాల్చి విసురుతుండటం కనిపించింది.
థానే జిల్లా ఉల్హాస్నగర్ ప్రాంతంలో సోమవారం రాత్రి ఈ ఘటన జరిగింది. దుండగుడు పలు రాకెట్లను అపార్ట్మెంట్ వైపు విసరగా అవి అపార్ట్మెంట్ వాసుల బాల్కనీలోకి దూసుకొచ్చాయి. ఈ ఘటన ఉల్హాస్నగర్లో కలకలం రేపింది. ఈ వీడియోలో ఓ వ్యక్తి బిల్డింగ్ వెలుపల చేతిలో రాకెట్లతో నిల్చుని ఉండటం కనిపించింది.
పటాకులను పేల్చగానే దివాళీ రాకెట్లు అపార్ట్మెంట్ కిటికీలు, బాల్కనీల్లో గుండా నేరుగా ఇండ్లలోకి దూసుకెళ్లడం కనిపించింది. ఈ వీడియో సోషల్ మీడియాలో వైరల్ కావడంతో థానే పోలీసులు గుర్తుతెలియని యువకుడిపై కేసు నమోదు చేశారు. నిందితుడిని పట్టుకునేందుకు గాలింపు చర్యలు ముమ్మరం చేశారు.