న్యూఢిల్లీ, మే 14: లోక్సభ ఎన్నికలకు సంబంధించిన పోలింగ్ శాతం, ఇతర వివరాల వెల్లడిలో ఎన్నికల సంఘం సంపూర్ణ పారదర్శకత పాటించాలని పౌరసంఘాల ప్రతినిధులు కోరారు. ఈ మేరకు నాలుగు వేల మంది సంతకాలతో కూడిన అర్జీని మంగళవారం ఈసీకి అందజేశారు. మొదటి రెండు విడతల ఎన్నికలకు సంబంధించిన గణాంకాల వెల్లడిలో చోటుచేసుకున్న హెచ్చుతగ్గులను వారు ప్రధానంగా ప్రస్తావిస్తూ ఈ చర్య కారణంగా ఎన్నికల సంఘం పనితీరు, పారదర్శకత పట్ల ప్రజల్లో పలు అనుమానాలు వస్తున్నాయని పేర్కొన్నారు.
మొదటి రెండు విడతల్లో ఎన్నికలైనప్పుడు ప్రకటించిన శాతానికి, తర్వాత చాలా రోజులకు ప్రకటించిన తుది పోలింగ్ శాతానికి 6 శాతానికి పైగా తేడా ఉందని, ఈ తుది వివరాలపై ఈసీ ఎలాంటి సంతృప్తికరమైన వివరణ ఇవ్వకుండానే విడుదల చేసిందన్నారు. ఈ అర్జీపై సంతకం చేసిన వారిలో న్యాయవాదులు, సామాజిక కార్యకర్తలు, సివిల్ సర్వీస్ మాజీ అధికారులు ఉన్నారు.