Farmers | ముంబై, జూలై 21: బీజేపీ నేతృత్వంలోని సంకీర్ణ కూటమి పాలనతో మహారాష్ట్రలో రైతుల పరిస్థితి అత్యంత దయనీయంగా తయారైంది. ఈ ఏడాది మొదటి ఆరు నెలల కాలంలో 1,267 మంది రైతులు ఆత్మహత్యలు చేసుకున్నారు. విదర్భ ప్రాంతంలోని అమరావతి డివిజన్లో అత్యధికంగా 557 మంది బలవన్మరణానికి పాల్పడ్డారు. ఈ ఏడాది జనవరి నుంచి జూన్ వరకు రైతు ఆత్మహత్యలపై రాష్ట్ర ప్రభుత్వం విడుదల చేసిన గణాంకాల ప్రకారం, ఛత్రపతి శంభాజీనగర్ డివిజన్లో 430 మంది, నాసిక్ డివిజన్లో 137 మంది, నాగపూర్ డివిజన్లో 130, పుణె డివిజన్లో 13 మంది రైతులు ఆత్మహత్యకు పాల్పడ్డారు.
జాతీయ నేర గణాంకాల బ్యూరో నివేదిక ప్రకారం, 2022 ఏడాదికి సంబంధించి దేశంలోనే అత్యధికంగా రైతు ఆత్మహత్యలు మహారాష్ట్రలోనే (37.6శాతం) చోటుచేసుకున్నాయి. 2022లో దేశవ్యాప్తంగా మొత్తం 11,290 మంది రైతులు బలన్మరణానికి పాల్పడ్డారు. ఇందులో 5,207 మంది రైతులు, 6,083 మంది రైతు కూలీలు ఉన్నారు.