న్యూఢిల్లీ: దూర ప్రయాణమంటేనే పెద్ద లగేజీ ఉంటుంది. విమానాశ్రయాల్లో వీటి చెక్-ఇన్ పెద్ద ప్రహసనంలా సాగుతుంది. అయితే ప్రయాణికుల సౌలభ్యం కోసం దేశంలోనే మొట్టమొదటిసారిగా ఢిల్లీలోని ఇందిరాగాంధీ ఇంటర్నేషనల్ ఎయిర్పోర్ట్లో సోమవారం నుంచి ‘సెల్ఫ్ చెక్-ఇన్’ సర్వీసు అమల్లోకి వచ్చింది. ఇంతకు ముందులా కాకుండా, లగేజ్ చెక్-ఇన్ను తక్కువ సమయంలో పూర్తి చేసేలా 50 ‘సెల్ఫ్ సర్వీస్ బ్యాగ్ డ్రాప్’ యూనిట్లను విమానాశ్రయంలో ఏర్పాటుచేశారు. ఈ యూనిట్ల వద్ద ప్రయాణికులు తమంతట తామే లగేజ్ చెక్-ఇన్ను పూర్తిచేయవచ్చు. వాటి ట్యాగ్లు, బోర్డింగ్ పాస్లను ప్రింట్ తీసుకొని విమానంలోకి అడుగుపెట్టడమే తరువాయి. సెల్ఫ్ చెక్-ఇన్ వ్యవస్థను తొలుత కెనడాలోని టొరంటో ఎయిర్పోర్ట్లో తీసుకొచ్చారు. ఆ తర్వాత దీన్ని అందుబాటులోకి తీసుకొచ్చిన ఘనత ఢిల్లీ ఎయిర్పోర్ట్కు దక్కుతుంది.