ముంబై: బాలిక, ఒక వ్యక్తి మధ్య ఉన్నది ప్రేమ సంబంధమేనని కోర్టు భావించింది. బాలికపై లైంగిక దాడి కామం వల్ల జరిగిందని కాదని పేర్కొంది. (Love, Not Lust) నిందితుడికి బెయిల్ మంజూరు చేసింది. 2020 ఆగస్ట్లో మహారాష్ట్రకు చెందిన 13 ఏళ్ల బాలిక డబ్బు, నగలతోసహా ఇంటి నుంచి వెళ్లిపోయింది. 26 ఏళ్ల ప్రియుడు నితిన్ ధబేరావ్ వద్దకు చేరింది. బాలిక అదృశ్యంపై ఆమె తండ్రి పోలీసులకు ఫిర్యాదు చేశాడు. దీంతో నితిన్ వద్ద ఉన్న బాలికను పోలీసులు గుర్తించారు. పోస్కో చట్టం, లైంగిక దాడి, కిడ్నాప్ వంటి పలు సెక్షన్ల కింద కేసు నమోదు చేసి అతడ్ని అరెస్ట్ చేశారు.
కాగా, నితిన్ తాను ప్రేమించుకున్నట్లు ఆ బాలిక పోలీసులకు తెలిపింది. తమ మధ్య ప్రేమ వ్యవహారం ఉన్నట్లు చెప్పింది. తనను పెళ్లి చేసుకుంటానని ప్రియుడు హామీ ఇవ్వడంతో ఇంట్లోని డబ్బు, నగలతో తనకు తానే అతడి వద్దకు వెళ్లినట్లు ఒప్పుకుంది. ఈ నేపథ్యంలో నిందితుడు నితిన్ బెయిల్ పిటిషన్పై బాంబే హైకోర్టు సానుకూలంగా స్పందించింది.
మరోవైపు ఆ బాలిక, వ్యక్తి మధ్య ఉన్నది ప్రేమే కాని కామం కాదని మహిళా న్యాయమూర్తి ఊర్మిళ జోషి అభిప్రాయపడ్డారు. ఈ విషయాన్ని మైనర్ బాలిక స్వయంగా పోలీసులకు చెప్పిన విషయాన్ని కోర్టు గమనించిందని అన్నారు. ‘లైంగిక దాడిగా ఆరోపించిన కేసులో ఇద్దరి మధ్య ఉన్న సంబంధం ప్రేమ, ఆకర్షణగా కనిపిస్తోంది. నిందితుడు బాధితురాలిని కామంతో లైంగిక వేధింపులకు గురి చేసినట్లు కాదని తెలుస్తోంది’ అని కోర్టు పేర్కొంది. నిందితుడైన నితిన్కు బెయిల్ మంజూరు చేసింది.