Election results : ఈ ఎన్నికల్లో ఎన్డీఏ కూటమి ప్రభుత్వ ఏర్పాటుకు అవసరమైనన్నీ సీట్లు సాధించినా.. ఏ పార్టీకి సొంతంగా ప్రభుత్వాన్ని ఏర్పాటు చేసేంత మెజారిటీ మాత్రం దక్కలేదు. ఈ నేపథ్యంలో సంకీర్ణ సర్కారు ఏర్పాటుకు ఎన్డీఏ సిద్ధమవుతుంటే.. ఎన్డీఏలోని కీలక భాగస్వామ్యపక్షాలైన జేడీయూ, టీడీపీని తమవైపు తిప్పుకుని ప్రభుత్వాన్ని ఏర్పాటు చేసే అవకాశాలపై ఇండియా కూటమి పావులు కదుపుతోంది.
అయితే ఈ ఎన్నికల్లో కొందరు భారీ మెజారిటీతో విజయం సాధిస్తే.. మరికొందరు స్వల్ప మెజారిటీతో గట్టెక్కారు. మహారాష్ట్రలో ఓ అభ్యర్థిని కేవలం 48 ఓట్ల తేడాతో విజయం వరించింది. మహారాష్ట్రలోని ముంబయి నార్త్వెస్ట్ లోక్సభ స్థానం నుంచి ఏక్నాథ్ శిండే వర్గం శివసేన పార్టీ నుంచి రవీంద్ర దత్తారామ్ వైకర్ పోటీ చేశారు. ఉద్ధవ్ ధాక్రే శివసేన (యూబీటీ) నుంచి అన్మోల్ కీర్తికర్ నిలబడ్డారు.
వీరి మధ్య ఆద్యంతం గెలుపు ఊగిసలాడింది. చివరకు 48 ఓట్ల తేడాతో ఏక్నాథ్ షిండే వర్గానికి చెందిన రవీంద్ర దత్తారామ్ విజయం సాధించారు. ఈ ఎన్నికల్లో దత్తారామ్కు 4,52,644 ఓట్లు రాగా.. ప్రత్యర్థి అన్మోల్కు 4,52,596 ఓట్లు పోలయ్యాయి. ఇక్కడ నోటాకు 15,161 ఓట్లు పడటం గమనార్హం. ఆ తర్వాత కేరళలోని అత్తింగళ్ స్థానంలో కాంగ్రెస్ అభ్యర్థి అడ్వొకేట్ అదూర్ ప్రకాశ్ తన సమీప ప్రత్యర్థిపై 684 ఓట్లతో నెగ్గారు.
ప్రకాశ్కు 3,28,051 ఓట్లు రాగా.. 3,27,367 ఓట్లతో సీపీఎం అభ్యర్థి వీ జాయ్ రెండో స్థానంలో నిలిచారు. ఇక్కడ నోటాకు 9,791 ఓట్లు పోలయ్యాయి. ఒడిశాలోని జయపురంలో బీజేపీ అభ్యర్థి రబీంద్ర నారాయణ్ బెహరా (5,34,239 ఓట్లు).. తన సమీప బిజూ జనతాదళ్ అభ్యర్థి శర్మిష్ఠా సేథి (5,32,652)పై 1,587 ఓట్లతో విజయం సాధించారు. ఇక్కడ నోటాకు 6,788 ఓట్లు పడ్డాయి.
రాజస్థాన్లోని జైపుర్ రూరల్లో కాంగ్రెస్ అభ్యర్థి అనిల్ చోప్రా (6,16,262).. బీజేపీ అభ్యర్థి రాజేంద్ర సింగ్ (6,17,877 ఓట్లు) చేతిలో 1,615 ఓట్లతో ఓడిపోయారు. ఇక్కడ కూడా మెజార్టీ కంటే నోటాకే అత్యధికంగా 7,519 ఓట్లు పోలయ్యాయి. ఛత్తీస్గఢ్లోని కాంకేర్ స్థానంలో బీజేపీ అభ్యర్థి భోజ్రాజ్ నాగ్ (5,97,624).. తన సమీప కాంగ్రెస్ అభ్యర్థి బీరేశ్ ఠాకుర్ (5,95,740)పై 1,884 ఓట్ల మెజారిటీతో విజయం సాధించారు. ఇక్కడ నోటాకు ఏకంగా 18,669 ఓట్లుపడ్డాయి.