Remote Mind Control | సియోల్, జూలై 23: హీరో సూర్య నటించిన ‘సెవెన్త్ సెన్స్’ సినిమా చూశారా? అందులో విలన్ వశీకరణ విద్యతో ఎదుటివారి మెదడుని ఆధీనంలోకి తీసుకొని కండ్లతోనే ఆడిస్తాడు. ఇలాంటివి సినిమాలు, కథల్లోనే సాధ్యమని ఇప్పటివరకూ అనుకొన్నాం. అయితే, నిజ జీవితంలోనూ అవతలి వ్యక్తి మెదడును నియంత్రించవచ్చని దక్షిణ కొరియాకు చెందిన కొరియా ఇన్స్టిట్యూట్ ఆఫ్ బేసిక్ సైన్స్ శాస్త్రవేత్తలు చెబుతున్నారు.
ఎదుటి వ్యక్తుల మెదళ్లను ఆధీనంలోకి తీసుకోవడానికి టీవీ రిమోట్ లాంటి ప్రత్యేక పరికరం అవసరమని శాస్త్రవేత్తలు చెప్తున్నారు. తాము అభివృద్ధి చేసిన ప్రత్యేక పరికరంలోని అయస్కాంత క్షేత్రాలను ఉపయోగించి మెదడును వశం చేసుకోవచ్చని అంటున్నారు. బ్రెయిన్ మాడ్యులేటింగ్ టెక్నాలజీ సాయంతో సృష్టించే ఈ ప్రత్యేక తరంగాలు మెదడుతో అనుసంధానమై.. రిమోట్ ద్వారా ఇచ్చే ప్రత్యేక కమాండ్లను నెరవేరుస్తాయని చెప్తున్నారు. ఎలుకలపై చేసిన ప్రయోగం విజయవంతమైందని, త్వరలో మనుషుల మీద కూడా ఈ తరహా ప్రయోగాలు చేయనున్నట్టు వెల్లడించారు.
‘మ్యాగ్నెటో-మెకానికల్ జెనెటిక్స్’గా పిలుస్తున్న ఈ టెక్నాలజీని మెదడు పనితీరు, ఆర్టిఫిషియల్ న్యూరల్ నెట్వర్క్స్, టూ వే బ్రెయిన్ కంప్యూటర్ ఇంటర్ఫేస్ టెక్నాలజీస్, నాడీ సంబంధ వ్యాధుల నిర్ధారణలో ఉపయోగించవచ్చని శాస్త్రవేత్తలు వివరించారు.