Karnataka | బెంగళూరు, జూలై 20: కర్ణాటక ప్రజలపై కాంగ్రెస్ సర్కారు మరో గుదిబండ వేసేందుకు సిద్ధమైంది. ఇప్పటికే పాలు, పెట్రోల్, డీజిల్ ధరలు పెంచిన ప్రభుత్వం ఇప్పుడు సినిమా టికెట్లపైనా భారం మోపాలని నిర్ణయించింది. రాష్ట్రంలోని అన్ని సినిమా థియేటర్లలో టికెట్లపై సెస్ విధించాలని నిర్ణయం తీసుకుంది. ఓటీటీ సబ్స్క్రిప్షన్లపై కూడా సెస్ వసూలు చేయనుంది. శుక్రవారం అసెంబ్లీలో ప్రవేశపెట్టిన కర్ణాటక సినీ అండ్ కల్చరల్ యాక్టివిస్ట్స్(వెల్ఫేర్) బిల్ – 2024లో ఈ సెస్ గురించి పొందుపరిచింది. అన్ని సినిమా టికెట్లు, ఓటీటీ సబ్స్క్రిప్షన్లపై 2 శాతం వరకు సెస్ విధించనున్నట్టు తెలుస్తున్నది. ప్రతి మూడేండ్లకు ఒకసారి ఈ సెస్ను సమీక్షించి అవసరమైతే మార్పులు చేయనుంది.
సెస్ ద్వారా వసూలైన నిధులను సినీరంగంలో పని చేస్తున్న ఆర్టిస్టులు, సిబ్బంది సంక్షేమం కోసం వినియోగిస్తామని ప్రభుత్వం చెప్తున్నది. ఇందుకోసం సినిమాటోగ్రఫీ మంత్రి నేతృత్వంలో ఓ బోర్డును ఏర్పాటు చేస్తామని అంటున్నది. అయితే, ప్రతిపక్ష బీజేపీ మాత్రం.. కాంగ్రెస్ కుంభకోణాలు, తెలివి తక్కువగా ప్రవేశపెట్టిన గ్యారెంటీలతో ఖాళీ అయిన ఖజానాను నింపుకునేందుకే ఈ సెస్ విధిస్తున్నదని ఆరోపిస్తున్నది.
గత ఏడాది జరిగిన అసెంబ్లీ ఎన్నికల్లో అధికారంలోకి వచ్చేందుకు ఐదు గ్యారెంటీల పేరిట కర్ణాటక కాంగ్రెస్ ప్రజలకు హామీలు ఇచ్చింది. అధికారంలోకి వచ్చిన ఏడాదిలోనే లోక్సభ ఎన్నికలు ముంచుకురావడంతో ఈ గ్యారెంటీలను వేగంగా అమలు చేసింది. దీంతో రాష్ట్ర ఖజానా ఖాళీ అయ్యిందని బీజేపీ, జేడీఎస్ ఆరోపిస్తున్నాయి. అందుకే, వరుసగా అన్ని ధరలను పెంచుతున్నదని పేర్కొంటున్నాయి. ఈ నెల ఆరంభంలో కర్ణాటక మిల్క్ ఫెడరేషన్(కేఎంఎఫ్) పాల ధరపై లీటరుకు రూ.2 పెంచింది.
ఈ ఏడాదిలో పాల ధరను పెంచడం ఇది రెండోసారి. గత నెల పెట్రోల్, డీజిల్ ధరలపై సేల్స్ ట్యాక్స్ను కాంగ్రెస్ ప్రభుత్వం పెంచింది. దీంతో లీటరు పెట్రోల్పై రూ.3, లీటరు డీజిల్పై రూ.3.02 ధర పెరిగింది. ఇక, మహిళలకు ఉచిత బస్సు ప్రయాణం వల్ల కేఎస్ఆర్టీసీకి రూ.295 కోట్ల నష్టం వచ్చిందని, కాబట్టి బస్సు చార్జీలను 15 – 20 శాతం పెంచాలని ప్రభుత్వానికి కేఎస్ఆర్టీసీ ప్రతిపాదనలు పెట్టింది. ఇలా లోక్సభ ఎన్నికలు ముగిసిన నాటి నుంచి కర్ణాటక ప్రజలపై ప్రభుత్వం వరుసగా ధరల భారాన్ని మోపుతున్నది.