IRCTC | న్యూఢిల్లీ, జూన్ 22: మీ స్నేహితులకో, తెలిసిన వారికో మీ వ్యక్తిగత ఐఆర్సీటీసీ ఐడీ మీద ఆన్లైన్లో రైల్వే టిక్కెట్లు బుక్ చేస్తున్నారా? అయితే జాగ్రత్త.. అలా చేస్తే మీకు జైలు శిక్ష, భారీ జరిమానా ఖాయం. రిజర్వేషన్లకు సంబంధించి ప్రభుత్వం కొన్ని కొత్త నిబంధనలు అమల్లోకి తెచ్చింది. సెక్షన్ 143 రైల్వే చట్టం ప్రకారం ఇక నుంచి కేవలం ఆధీకృత ఏజెంట్లు మాత్రమే థర్డ్ పార్టీ పేరుపై రిజర్వేషన్ టిక్కెట్లు బుక్ చేయాలి. మీ కుటుంబ సభ్యులకు, మీ ఇంటిపేరు ఉన్న వారికి, రక్త సంబంధీకులకు మాత్రమే మీ వ్యక్తిగత ఐడీ పేరున రిజర్వేషన్ టిక్కెట్లు బుక్ చేయాలి.
దానిని అతిక్రమించితే రూ.10 వేల జరిమానా, మూడేండ్ల జైలు లేదా రెండు శిక్షలూ విధిస్తారు. కాబట్టి ఇక నుంచి పౌరులు తమ ఐడీని వేరేవారికి ఇవ్వవద్దని రైల్వే శాఖ విజ్ఞప్తి చేసింది. కాగా, ఐఆర్సీటీసీ ఐడీకి ఆధార్ను అనుసంధానం చేసిన వారు నెలకు 24, అనుసంధానం చేయని వారు 12 టిక్కెట్లను బుక్ చేసుకునే సౌకర్యాన్ని ఐఆర్సీటీసీ కల్పించింది.