IRCTC | ఐఆర్సీటీసీ వ్యక్తిగత అకౌంట్ నుంచి బంధువులు, ఫ్రెండ్కి ఆన్లైన్లో రైలు టికెట్లు బుక్ చేస్తే భారీ జరిమానాతో పాటు జైలుశిక్ష పడే అవకాశం ఉందని ప్రచారం జరుగుతున్నది. గత కొద్దిరోజులుగా సోషల్ మీడియాలో జరుగుతున్న ప్రచారంపై రైల్వేశాఖ క్లారిటీ ఇచ్చింది. సోషల్ మీడియాలో జరుగుతున్న ప్రచారంలో ఎలాంటి వాస్తవం లేదని వెల్లడించింది. వార్తలు తప్పదోవ పట్టించేలా ఉన్నాయని పేర్కొంది. ఐఆర్సీటీసీ వ్యక్తిగత యూజర్ ఐడీ సహాయంతో కుటుంబీకులులు, బంధువులు, ఫ్రెండ్స్ ఎవరికైనా ఈ-టికెట్లను బుక్ చేసుకోవాలరి క్లారిటీ ఇచ్చింది. అయితే, ఒక ఐడీతో నెలకు కనీసం 12 టికెట్లు పొందవచ్చని.. ఆధార్ అనుసంధానం చేసిన యూజర్లు నెలలో 24 టికెట్లు బుక్ చేసుకోవచ్చని చెప్పింది.
పర్సనల్ ఐడీతో బుక్ చేసిన ఈ టికెట్స్ వాణిజ్యపరమైన అవసరాల కోసం మాత్రం కాదని చెప్పింది. అయితే, నిబంధనలు ఉల్లంఘిస్తే రైల్వేచట్టం 1989లోని సెక్షన్ 143 ప్రకారం నేరమని రైల్వేశాఖ ప్రతినిధి ఒకరు తెలిపారు. రైల్వేబోర్డు మార్గదర్శకాలకు అనుగుణంగా ఐఆర్సీటీసీ వెబ్సైట్లో టికెట్స్ బుకింగ్ జరుగుతాయని.. ఈ మార్గదర్శకాలకు సంబంధించి పబ్లిక్ డొమైన్లో సమాచారం అందుబాటులో ఉందని పేర్కొన్నారు. యూజర్లు వ్యక్తిగత యూజర్ అకౌంట్ నుంచి స్నేహితులు, కుటుంబీకులు, బంధువులకు సైతం టికెట్లను బుక్ చేసుకోవచ్చని వివరించారు.