చండీగఢ్ : హర్యానాలోని నుహ్ జిల్లాలో బ్రజ్ మండల్ జలాభిషేక యాత్ర సందర్భంగా ప్రభుత్వం కట్టుదిట్టమైన భద్రతా ఏర్పాట్లు చేసింది. ఆదివారం సాయంత్రం 6 గంటల నుంచి సోమవారం సాయంత్రం 6 గంటల వరకు మొబైల్ ఇంటర్నెట్, బల్క్ ఎస్ఎంఎస్ సేవలను నిలిపివేయాలని ఆదేశించింది. వాట్సాప్, ఫేస్బుక్, ట్విటర్ ద్వారా తప్పుడు సమాచారం వ్యాపించకుండా నిరోధించేందుకు ఈ నిర్ణయం తీసుకున్నట్లు తెలిపింది. గత ఏడాది ఈ యాత్ర సందర్భంగా హింసాత్మక సంఘటనలు జరిగిన సంగతి తెలిసిందే. ఈ ఏడాది భక్తులకు భద్రత కల్పించేందుకు 2,500 మంది సిబ్బందిని మోహరించినట్లు పోలీసులు తెలిపారు. డ్రోన్ల ద్వారా ప్రతి ఒక్కరినీ నిశితంగా గమనిస్తామని నుహ్ పోలీస్ సూపరింటెండెంట్ విజయ్ ప్రతాప్ సింగ్ చెప్పారు. బ్రజ్ మండల్ జలాభిషేక యాత్ర నుహ్లోని నల్హర్ దేవాలయం నుంచి సింగార్లోని శృంగేశ్వర్ దేవాలయం వరకు జరుగుతుంది.