ముంబై, జూలై 22: ముంబై నావల్ డాక్యార్డ్లో మరమ్మత్తులు జరుపుకుంటున్న యుద్ధ నౌక ‘ఐఎన్ఎస్ బ్రహ్మపుత్ర’లో ఆదివారం పెద్ద ఎత్తున మంటలు చెలరేగాయి. డాక్యార్డ్లో ఇతరుల సాయంతో అగ్నిమాపక సిబ్బంది కొన్ని గంటలపాటు శ్రమించి మంటల్ని అదుపులోకి తీసుకొచ్చినట్టు భారత నౌకాదళం సోమవారం తెలిపింది.
ఈ ఘటనలో ఓ నావికుడు గల్లంతయ్యాడని, యుద్ధ నౌకలోని ఓ వైపు భాగం దెబ్బతిన్నదని వెల్లడించింది. గల్లంతైన నావికుడి ఆచూకీ కోసం గాలిస్తున్నట్టు పేర్కొన్నది. యుద్ధ నౌకలో మంటలు అదుపులోకి వచ్చినా, యుద్ధనౌక నిటారుగా నిలువలేక.. ఓ వైపునకు ఒరిగిపోయింది. సిబ్బంది ఎన్ని ప్రయత్నాలు చేసినప్పటకీ.. యుద్ధ నౌక తిరిగి పూర్వపు స్థితికి రాలేకపోయింది. ఘటనపై భారత నౌకాదళం విచారణకు ఆదేశించింది.