న్యూఢిల్లీ/మాలే: మాల్దీవులను భారత సైన్యం (Indian Troops) వీడాల్సిన అవసరం ఉందని కొత్తగా ఎన్నికైన అధ్యక్షుడు మొహమ్మద్ ముయిజ్జు తెలిపారు. దీని కోసం భారత్తో చర్చలు ప్రారంభించినట్లు చెప్పారు. మాల్దీవులలో భారత ఆర్మీ ఉనికికి వ్యతిరేకంగా ఎన్నికల్లో ప్రచారం చేసిన ఆయన పార్టీ విజయం సాధించింది. ఈ నేపథ్యంలో ముయిజ్జు శుక్రవారం మీడియాకు ఇచ్చిన ఇంటర్వ్యూలో మాట్లాడారు. తమ దేశం నుంచి భారత ఆర్మీ వైదొలగాల్సిన అవసరం ఉందని అన్నారు. భారత ప్రభుత్వంతో చర్చలు జరుగుతున్నాయని, అవి విజయవంతమయ్యాయని తెలిపారు. ‘పరస్పర ప్రయోజనకరమైన ద్వైపాక్షిక సంబంధాన్ని మేం కోరుకుంటున్నాం. భారతీయ సైనికుల స్థానంలో చైనా లేదా ఇతర దేశాల దళాలు ఉండవు’ అని బ్లూమ్బెర్గ్తో అన్నారు.
కాగా, హిందూ మహాసముద్రంపై పెత్తనం కోసం భారత్, చైనా మధ్య పోటీ నెలకొన్నది. దీంతో ఇక్కడ కీలకంగా ఉన్న మాల్దీవులలో రెండు దేశాలు పోటాపోటీగా పెట్టుబడులు పెట్టడంతోపాటు ఆ దేశ అభివృద్ధికి భారీగా రుణాలు ఇస్తున్నాయి. ఈ నేపథ్యంలో ఆ దేశంలో ఎన్నికైన ప్రభుత్వాలు భారత్ లేదా చైనా వైపు మొగ్గుచూపుతాయి.
మరోవైపు ఎన్నికల్లో ఓడిన తాజా అధ్యక్షుడు ఇబ్రహీం సోలిహ్ భారత్కు అనుకూలంగా వ్యవహరించారు. ఈ నేపథ్యంలో సుమారు 70 మంది భారతీయ సైనికులు మాల్దీవుల్లో ఉన్నారు. భారత్ ఏర్పాటు చేసిన రాడార్ స్టేషన్లు, మోహరించిన నిఘా విమానాలను వారు నిర్వహిస్తున్నారు. అలాగే మాల్దీవుల ప్రత్యేక ఆర్థిక జోన్లో పెట్రోలింగ్ కోసం భారత యుద్ధనౌకలు కూడా సహకరిస్తున్నాయి.