న్యూఢిల్లీ, జూన్ 5: బీజేపీ ప్రభుత్వం దేశాన్ని పరిపాలించొద్దని ప్రజలు ఈ ఎన్నికల ద్వారా ఆకాంక్షించారని, వారి ఆకాంక్షను నెరవేర్చడానికి సరైన సమయంలో సరైన అడుగులు వేస్తామని కాంగ్రెస్ జాతీయ అధ్యక్షుడు మల్లికార్జున ఖర్గే పేర్కొన్నారు. లోక్సభ ఎన్నికల ఫలితాల తర్వాత బుధవారం మొదటిసారి ఢిల్లీలో ఇండియా కూటమి నేతలు సమావేశమయ్యారు. దాదాపు రెండున్నర గంటల పాటు వీరి సమావేశం కొనసాగింది. ప్రభుత్వ ఏర్పాటుకు అవకాశాలున్నాయా, చంద్రబాబు, నితీశ్ కుమార్తో చర్చలు జరపాలా, ప్రతిపక్షంలోనే కొనసాగాలా అనే అంశాలపై నేతలు చర్చించారు.
ఇప్పుడైతే ప్రతిపక్షంలోనే కొనసాగాలని, బీజేపీ ప్రభుత్వంపై పోరాడాలని కూటమి నేతలు నిర్ణయం తీసుకున్నారు. అయితే, భవిష్యత్తులో ప్రభుత్వ ఏర్పాటుకు అవకాశం వస్తే వినియోగించుకోవాలని నిర్ణయించారు. బీజేపీకి, ఆ పార్టీ ద్వేష రాజకీయాలు, అవినీతికి సరైన ప్రజలు సరైన తీర్పు ఇచ్చారని అన్నారు. దేశ రాజ్యాంగాన్ని, ప్రజాస్వామ్యాన్ని రక్షించుకునేందుకు, ధరల పెరుగుదల, నిరుద్యోగానికి వ్యతిరేకంగా ప్రజలు తీర్పు ఇచ్చారని ఆయన పేర్కొన్నారు. ప్రధాని మోదీకి ఇది స్పష్టమైన నైతిక ఓటమి అని, ఆయనకు వ్యక్తిగతంగానూ భారీ రాజకీయ ఓటమి అని అన్నారు.