న్యూఢిల్లీ: లోక్సభ ఎన్నికల నేపథ్యంలో దేశవ్యాప్తంగా ఆదాయపన్ను శాఖ(Income Tax) నిర్వహించిన సోదాల్లో సుమారు 1100 కోట్ల నగదును సీజ్ చేశారు. దీంట్లో నగలు కూడా ఉన్నాయి. అధికార వర్గాల ప్రకారం.. మే 30వ తేదీ వరకు ఆదాయపన్ను శాఖ మొత్తం 1100 కోట్ల విలువైన క్యాష్, జ్వలరీని సీజ్ చేసింది. 2019 నాటి ఎన్నికలతో పోలిస్తే సీజ్ చేసిన అమౌంట్ 182 శాతం అధికంగా ఉన్నట్లు అధికారులు చెప్పారు. గత లోక్సభ ఎన్నికల వేళ 390 కోట్ల నగదును సీజ్ చేశారు.
ఈ ఏడాది మే 16వ తేదీ నుంచి ఎన్నికల నియమావళి అమలులోకి వచ్చిన విషయం తెలిసిందే. ఆ నాటి నుంచి ఐటీ శాఖ అన్ని రాష్ట్రాల్లోనూ దాడులు, సోదాలు, తనిఖీలను పెంచేసింది. ఓటర్లను ప్రభావితం చేసేందుకు వాడుతున్న డబ్బును సీజ్ చేశారు. ఢిల్లీ, కర్నాటక రాష్ట్రాల్లో అత్యధిక మొత్తంలో అమౌంట్ను సీజ్ చేశారు. ఈ రెండు రాష్ట్రాల్లో రెండు వందల కోట్లకు పైగా నగదు, జ్వలరీని స్వాధీనం చేసుకున్నారు. ఆ తర్వాత లిస్టులో తమిళనాడు ఉన్నది. ఆ రాష్ట్రంలో 150 కోట్ల వరకు సీజ్ చేశారు.
ఏపీ, తెలంగాణ, ఒడిశా రాష్ట్రాల్లో సుమారు వంద కోట్ల వరకు నగదును పట్టుకున్నారు. ఈసీ ప్రకటన తర్వాత 24×7 కంట్రోల్ రూమ్లను ఏర్పాటు చేసిన ఐటీశాఖ తనిఖీలు నిర్వహించింది. 50 వేల కన్నా ఎక్కువ నగదు, పత్రాలులేని పది వేల ఖరీదు చేసే వస్తువులను సీజ్ చేశారు. పది లక్షల నగదును సీజ్ చేసిన కేసులను.. ఐటీశాఖ స్క్రూటినీకి పంపిస్తారు.