Nitin Gadkari | హైదరాబాద్, జూలై 13 (స్పెషల్ టాస్క్ బ్యూరో, నమస్తే తెలంగాణ): ఇటీవలి లోక్సభ ఎన్నికల్లో భంగపాటుకు గురై, మిత్రపక్షాల సాయంతో అధికారంలోకి వచ్చిన బీజేపీపై సొంతపార్టీ నేతలే విమర్శలు ఎక్కుపెడుతున్నారు. ఈ జాబితాలో తాజాగా కేంద్రమంత్రి నితిన్ గడ్కరీ కూడా చేరారు. ఇటీవల పనాజీలో జరిగిన గోవా బీజేపీ కార్యవర్గ సమావేశంలో ఆయన మాట్లాడుతూ, మిగతా పార్టీలతో పోలిస్తే, బీజేపీ భిన్నమైన పార్టీ అని, గతంలో కాంగ్రెస్ చేసిన తప్పులనే ఇప్పుడు బీజేపీ చేస్తున్నదంటూ పరోక్షంగా ఎత్తిచూపారు.
‘బీజేపీ భిన్నమైన పార్టీ. మిగతా వాటితో పోలిస్తే, బీజేపీకి చాలా ప్రత్యేకత ఉన్నదని నా గురువు, బీజేపీ అగ్ర నేత అద్వానీ చెప్పేవారు. కాంగ్రెస్ గతంలో అధికారంలో ఉన్నప్పుడు చేసిన తప్పుల కారణంగానే ఎన్నికల్లో ఓడిపోయింది. ఇప్పుడు బీజేపీ కూడా అటువంటి తప్పులే చేస్తే లాభమేంటి? అలాంటప్పుడు అధికారంలో ఉన్నా ప్రయోజనమేంటి? కాబట్టి, బీజేపీ అలాంటి తప్పిదాలకు దూరంగా ఉండాలి’ అని గడ్కరీ అన్నారు. సామాజిక, ఆర్థిక సంస్కరణలు తీసుకురావడానికి రాజకీయాలే సాయపడుతాయన్నారు. తన స్వరాష్ట్రం మహారాష్ట్రలో కుల రాజకీయాలకు చోటు లేదని, వాటిని ప్రోత్సహించేవారికి గట్టి దెబ్బ తగులుతుందని హెచ్చరించారు.