Sayantika Banerjee : ‘నా మీద నమ్మకంతో నన్ను గెలిపించిన ఓటర్లకు ధన్యవాదాలు’ అని ప్రముఖ బెంగాలీ నటి (Bengali actress), తృణమూల్ కాంగ్రెస్ (TMC) ఎమ్మెల్యే సయాంతిక బెనర్జి (Sayantika Banerjee) నియోజకవర్గ ఓటర్లకు కృతజ్ఞతలు తెలిపారు. శుక్రవారం ఎమ్మెల్యేగా ప్రమాణస్వీకారం చేసిన అనంతరం సయాంతిక మీడియాతో మాట్లాడారు.
‘నా మీద నమ్మకం ఉంచి నన్ను ఎమ్మెల్యేగా గెలిపించిన ఓటర్లకు ధన్యవాదాలు. నాతో ప్రమాణస్వీకారం చేయించడంలో చొరవ తీసుకున్న స్పీకర్కు కృతజ్ఞతలు’ అని ఆమె పేర్కొన్నారు. బెంగాల్లో పలు సినిమాల్లో నటించి పేరు సంపాదించుకున్న సయాంతిక బెనర్జి 2021 అసెంబ్లీ ఎన్నికల సమయంలో టీఎంసీలో చేరడం ద్వారా రాజకీయ రంగ ప్రవేశం చేశారు.
అయితే ఆ ఎన్నికల్లో ఆమె ఎమ్మెల్యేగా పోటీ చేయలేదు. 2024లో టీఎంసీ సీనియర్ నేత తపస్ రాయ్ పార్టీకి, ఎమ్మెల్యే పదవికి రాజీనామా చేసి బీజేపీలో చేరడంతో బారానగర్ అసెంబ్లీ స్థానం ఖాళీ అయ్యింది. దాంతో లోక్సభ ఎన్నికలతో పాటు ఈ స్థానానికి ఉప ఎన్నిక నిర్వహించారు. ఈ సందర్భంగా సయాంతిక టీఎంసీ అభ్యర్థిగా పోటీ చేసి విజయం సాధించారు. తాజాగా ఎమ్మెల్యేగా ప్రమాణస్వీకారం చేశారు.