న్యూఢిల్లీ: దేశ రాజధాని ఢిల్లీ శివారు ప్రాంతమైన హర్యానాలోని శంభు హైవేను మూసివేయడాన్ని సుప్రీంకోర్టు తప్పుపట్టింది. హైవేను ఎలా బ్లాక్ చేస్తారని ప్రశ్నించింది. శంభు సరిహద్దు (Shambhu Border) హైవేను తెరువాలని, ట్రాఫిక్ను అనుమతించాలని హర్యానా ప్రభుత్వాన్ని ఆదేశించింది. కనీస మద్దతు ధరతోపాటు తమ డిమాండ్ల కోసం ఫిబ్రవరి 13న ఛలో ఢిల్లీకి రైతు సంఘాలు పిలుపునిచ్చాయి. దీంతో రైతులను నిలువరించేందుకు శంభు సరిహద్దును హర్యానా ప్రభుత్వం మూసివేసింది. ఘర్షణల నేపథ్యంలో హైవేకు అడ్డుగా సిమెంట్ బారికేడ్లు, ఇనుప తీగలు ఏర్పాటు చేసింది. భారీగా పోలీసులను మోహరించింది. దీంతో రైతులు నాటి నుంచి అక్కడే మకాం వేశారు.
కాగా, శంభు సరిహద్దును తెరువాలని, ఏడు రోజుల్లో ట్రాఫిక్ను పునరుద్ధరించాలని హర్యానా ప్రభుత్వాన్ని పంజాబ్, హర్యానా హైకోర్టు ఆదేశించింది. జూలై 10న ఈ మేరకు తీర్పు ఇచ్చింది. హైకోర్టు ఆదేశాలను రైతులు స్వాగతించారు. దేశ రాజధానికి తమ పాదయాత్రను తిరిగి ప్రారంభిస్తామని ప్రకటించారు.
మరోవైపు హైకోర్టు ఆర్డర్ను సుప్రీంకోర్టులో హర్యానా ప్రభుత్వం అప్పీల్ చేసింది. జస్టిస్ సూర్యకాంత్, జస్టిస్ ఉజ్జల్ భుయాన్లతో కూడిన ద్విసభ్య ధర్మాసనం శుక్రవారం దీనిపై విచారణ జరిపింది. ‘ఒక రాష్ట్రం హైవేను ఎలా అడ్డుకుంటుంది? ట్రాఫిక్ను నియంత్రించాల్సిన బాధ్యత ఉంది. దానిని తెరువాలని మేం చెబుతున్నాం. కానీ వాహనాల కదలికలను నియంత్రించండి’ అని జస్టిస్ ఉజ్జల్ భుయాన్ అన్నారు. హర్యానా ప్రభుత్వం తరపు న్యాయవాదికి ఈ మేరకు సూచించారు.