రాంచీ, జూలై 24: కేంద్రం మంగళవారం ప్రవేశపెట్టిన బడ్జెట్లో జార్ఖండ్ రాష్ర్టాన్ని పూర్తిగా నిర్లక్ష్యం చేసిందని సీఎం హేమంత్ సొరేన్ ఆరోపించారు. తమ రాష్ర్టానికి కేంద్రం రూ.1.36 లక్షల కోట్లు బకాయి పడిందని, వాటిని వెంటనే చెల్లించాలని ఆయన డిమాండ్ చేశారు.
‘మా రాష్ట్రంపై ఎందుకు వివక్షకు పాల్పడ్డారు? ఇప్పటికే కేంద్రం మాకు రూ.1.36 లక్షల కోట్లు బకాయి ఉంది. కానీ, బీజేపీ నేతలంతా దీనిపై మౌనంగా ఉన్నారు. మీ ఊతకర్ర పార్టీలకే ప్రత్యేక ప్యాకేజీలు ఇచ్చుకోండి’ అని ఆయన బీహార్, ఏపీ ప్యాకేజీల గురించి ఆగ్రహం వ్యక్తం చేశారు.
జార్ఖండ్ రాష్ట్రం ఎన్డీఏకు 9 మంది ఎంపీలను ఇచ్చినా పూర్తి నిర్లక్ష్యం చూపారని ఆరోపించారు. దేశంలో 60 శాతం ప్రజలు ఆధారపడ్డ వ్యవసాయ రంగానికి ఇవ్వాల్సిన బడ్జెట్ను దోచి కేంద్రం తన కుబేర స్నేహితులకు కట్టబెట్టిందని సొరేన్ విమర్శించారు.