ముంబై, జూలై 25: భారీ వర్షాలతో మహారాష్ట్ర అతలాకుతలం అవుతున్నది. గురువారం ముంబైలో తెల్లవారు జామున 4 గంటల నుంచి మధ్యాహ్నం ఒంటి గంట వరకు 100 మి.మీ. పైగా వర్షపాతం నమోదయ్యింది. పలు ప్రాంతాల్లో 150 మి.మీ. పైగా వర్షం కురిసింది. ముంబైతో పాటు పుణె, థాణే, పాల్ఘార్ సహా పలు నగరాలను వరద ముంచెత్తింది. దీంతో ముంబైలోని స్కూళ్లు, కళాశాలలకు గురువారం సెలవు ప్రకటించారు. వర్షాల కారణంగా రాష్ట్రంలో ఆరుగురు మరణించారు. వీరిలో ముగ్గురు డెక్కన్ ప్రాంతంలో విద్యుదాఘాతంతో మృతి చెందారు. పింప్రి-చించ్వాడ్ ప్రాంతంలో వరద పోటెత్తింది. దీంతో ప్రజలను సురక్షిత ప్రాంతాలకు తరలించేందుకు ఆర్మీ రంగంలోకి దిగింది. పుణెకు 65 కిలోమీటర్ల దూరంలో ఉన్న లవాసా ప్రాంతంలో కొండచరియలు విరిగిపడ్డాయి. వర్షాలు, వరద కారణంగా ముంబై, పుణెలో ప్రజా రవాణా స్తంభించిపోయింది. ముంబైలో భారీ వర్షాల కారణంగా పలు విమానాలు రద్దయ్యాయని, ఇంకొన్ని విమానాలను మళ్లించినట్టు ఎయిర్ ఇండియా ప్రకటించింది. కాగా, మహారాష్ట్ర వ్యాప్తంగా భారీ వర్షాలు కొనసాగే అవకాశం ఉందని వాతావరణ శాఖ తెలిపింది. ముంబై, పుణెలో రెడ్ అలర్ట్ జారీ చేసింది.