గాంధీనగర్, నవంబర్ 3: గుజరాత్లో ఎన్నికల దంగల్కు తెరలేచింది. బీజేపీకి ఆత్మవంటి ఈ రాష్ట్రంలో తొలిసారి అసెంబ్లీ ఎన్నికల్లో త్రిముఖ పోటీ నెలకొన్నది. అధికార బీజేపీ, ప్రతిపక్ష కాంగ్రెస్ను సవాల్ చేస్తూ ఆమ్ఆద్మీ పార్టీ (ఆప్) ఎన్నికల బరిలోకి దూసుకొచ్చింది. దేశంలోని ఏ మూలలోనైనా రాజకీయంగా చక్రం తిప్పగల స్థాయిలో ఉన్న ప్రధాని మోదీ, కేంద్ర హోంమంత్రికి తమ సొంతరాష్ట్ర ఎన్నికలు ఇప్పుడు వ్యక్తిగత ప్రతిష్ఠగా మారాయి. 22 ఏండ్లుగా ప్రతిపక్ష పాత్రకే పరిమితమైన కాంగ్రెస్కు ఈసారి స్టార్ క్యాంపెయినర్లు కూడా కరువయ్యారు. మరోవైపు పంజాబ్లో అధికారాన్ని ఒడిసిపట్టి ఉత్సాహంతో ఉరకలేస్తున్న ఆప్.. గుజరాత్లో ఈసారి జెండా పాతాలని తహతహలాడుతున్నది.
మోదీ ప్రతిష్ఠకు పరీక్ష
గుజరాత్లో బీజేపీ 22 ఏండ్ల నుంచి వరుసగా గెలుస్తూ వస్తున్నది. కానీ, ఈసారి పరిస్థితి భిన్నంగా ఉన్నది. ఎన్నికల్లో గెలుపుపై ఆ పార్టీ నేతల్లో గుబులు మొదలైంది. దీంతో ప్రధాని మోదీ వ్యక్తిగత చరిష్మా, ప్రతిష్ఠనే ఆ పార్టీ నమ్ముకొన్నది. మోదీ కూడా గత రెండు నెలలుగా ఢిల్లీలోకంటే గుజరాత్లోనే ఎక్కువ కనిపిస్తున్నారు. సొంత రాష్ట్రంపై నిధుల కుంభవృష్ఠి కురిపిస్తున్నారు. ఇంత చేసినా బీజేపీపై ప్రజల్లో తీవ్రమైన వ్యతిరేకత కనిపిస్తున్నదని ఎన్నికల విశ్లేషకులు అంటున్నారు.
మరింత దిగజారిన కాంగ్రెస్
గుజరాత్లో సుదీర్ఘకాలం నుంచి ప్రధాన ప్రతిపక్షంగా ఉన్న కాంగ్రెస్ పరిస్థితి ఈసారి మరింత దిగజారింది. ఈసారి ఎన్నికల్లో ఆ పార్టీకి స్టార్ క్యాంపెయినర్లు కూడా కరువయ్యారు. కాంగ్రెస్కు ప్రధాన ఆకర్షణ అయిన సోనియా, రాహుల్ ఇటీవలి కాలంలో ఆ రాష్ట్రంలో అడుగు పెట్టలేదు. రాహుల్ భారత్ జోడో యాత్రలో బిజీగా ఉన్నారు. కొత్తగా కాంగ్రెస్ అధ్యక్ష బాధ్యతలు చేపట్టిన మల్లిఖార్జున ఖర్గేకు గుజరాత్లో అంతగా జనాకర్షణ లేదు. ఎన్నికల ప్రచార బాధ్యతలను స్థానిక నాయకత్వమే భుజాన వేసుకొన్నది.
దూసుకుపోతున్న ఆప్
ఎప్పుడూ బీజేపీ, కాంగ్రెస్ మధ్యనే సాగే ఎన్నికల పోరును ఈసారి ఆప్ త్రిముఖ పోరుగా మార్చేసింది. ఉచిత విద్యుత్తు, ఉచిత విద్య, ఉచిత వైద్యం వంటి ప్రజాకర్షక హామీలు గుప్పిస్తూ ఎన్నికల ప్రచారంలో దూసుకుపోతున్నది. ఇప్పటికే 72 స్థానాల్లో అభ్యర్థులను ప్రకటించింది. ఆప్ కన్వీనర్, ఢిల్లీ సీఎం అరవింద్ కేజ్రీవాల్ ఆ రాష్ట్రంలో సుడిగాలి పర్యటనలు చేస్తూ గుజరాతీలను ఆకర్షించే ప్రయత్నం చేస్తున్నారు. పంజాబ్లో బీజేపీ, కాంగ్రెస్ను మట్టికరిపించిన ఉత్సాహంలో ఉన్న ఆ పార్టీ.. గుజరాత్లోనూ జెండా పాతి జాతీయ పార్టీగా ఎదగాలని ఉవ్విళ్లూరుతున్నది.
గుజరాత్ ఎన్నికలను ప్రభావితం చేసే 10 అంశాలు
1. నరేంద్రమోదీ
ఎన్నికలు మొత్తం ప్రధాని మోదీ చుట్టే తిరుగుతున్నాయి. రాష్ట్ర నాయకత్వం బలహీనంగా ఉండటంతో మోదీనే బీజేపీ నమ్ముకొన్నది.
2. బిల్కిస్ రేపిస్టుల విడుదల
బిల్కిస్ సామూహిక లైంగికదాడి దోషులను బీజేపీ ప్రభుత్వం జైలు నుంచి వదిలిపెట్టడం ఈసారి ఎన్నికల్లో ప్రధానాంశంగా మారింది. వీరి విడుదలను మైనారిటీలు వ్యతిరేకిస్తుండగా, హిందూత్వవాదులు సమర్ధిస్తున్నారు.
3. ప్రభుత్వ వ్యతిరేకత
సుదీర్ఘకాలంగా పాలన సాగిస్తున్న బీజేపీపై గుజరాతీల్లో ప్రస్తుతం తీవ్ర అసంతృప్తి నెలకొన్నది. ఉద్యోగులు, కార్మికులు, రైతులు, వ్యాపారులు, మధ్యతరగతి వర్గం.. ఇలా ఎవరిని కదిలించినా ప్రభుత్వంపై దుమ్మెత్తి పోస్తున్నారు.
4. మోర్బీ దుర్ఘటన
మోర్బీనదిపై గత నెల 30న తీగల వంతెన కూలి 135 మంది మరణించటం గుజరాత్లో ప్రస్తుతం రాజకీయాస్త్రంగా మారింది. ఈ దుర్ఘటనలో అవినీతి కొట్టొచ్చినట్టు కనిపిస్తుండంతో ప్రజల్లో ఆగ్రహావేశాలు పెల్లుబికుతున్నాయి.
5. పేపర్ లీకులు
ఉద్యోగాల భర్తీ పరీక్షల్లో తరచూ ప్రశ్నపత్రాలు లీకవుతున్నాయి. దీంతో పరీక్షలు వాయిదాలు పడుతూ నిరుద్యోగులను అసహనానికి గురిచేస్తున్నాయి. రాష్ట్రంలో నిరుద్యోగం పెరిగిపోవటం, తరుచూ పరీక్షలు వాయిదా పడుతుండటంతో ప్రభుత్వంపై యువత ఆగ్రహంగా ఉన్నారు.
6. విద్య, వైద్య సౌకర్యాల లేమి
27 ఏండ్లుగా గుజరాత్ను బీజేపీ ఏలుతున్నా.. రాష్ట్రంలో విద్య, వైద్య సదుపాయాలు అథమస్థాయిలో ఉన్నాయి. గ్రామీణ ప్రాంతాల్లో ప్రాథమిక విద్య పరిస్థితి దయనీయంగా ఉన్నది. వైద్య సదుపాయాల పరిస్థితీ ఇలాగే ఉన్నది.
7. రైతుల ఆగ్రహం
బీజేపీ ప్రభుత్వం గుజరాత్ రైతులు ఆగ్రహంతో ఉన్నారు. గత రెండేండ్లుగా అతివృష్ఠి వల్ల పంటలు కోల్పోయిన రైతులకు ప్రభుత్వం పరిహారం ఇవ్వకుండా మోసం చేసింది. దీంతో పరిహారం కోసం ఇటీవల అనేకచోట్ల రైతులు రోడ్డెక్కారు.
8. రోడ్ల పరిస్థితి దారుణం
గుజరాత్లో పల్లెలు మొదలు రాజధాని వరకు ఎక్కడ చూసిన గుంతలు లేని రోడ్డు కనిపించటంలేదు. ప్రభుత్వం రహదారులను నిర్లక్ష్యం చేయటంతో ఇప్పుడవి నరకానికి నకళ్లుగా మారాయి.
9. విద్యుత్తు చార్జీల మంట
అత్యధిక విద్యుత్తు చార్జీలు ఉన్న రాష్ర్టాల్లో గుజరాత్ ముందు వరుసలో ఉన్నది. విద్యుత్తు సరఫరా వ్యవస్థను ప్రైవేటుకు అప్పగించటంతో వారు నిర్ణయించిందే రేటుగా సాగుతున్నది.
10. భూసేకరణ
వివిధ ప్రాజెక్టుల కోసం బలవంతపు భూసేకరణ కూడా ఈసారి ఎన్నికల ప్రచారాస్త్రంగా మారింది. ముఖ్యంగా అలహాబాద్-ముంబై హైస్పీడ్ బుల్లెట్ రైలు ప్రాజెక్టు, వడోదరా- ముంబై ఎక్స్ప్రెస్వే ప్రాజెక్టు కోసం భారీగా భూమిని సేకరించటాన్ని అక్కడి రైతులు వ్యతిరేకిస్తున్నారు.