(స్పెషల్ టాస్క్ బ్యూరో) హైదరాబాద్, జూలై 23 (నమస్తే తెలంగాణ): దేశీయ విద్యా సంస్థల్లో ఉన్నత విద్య కోసం విద్యార్థులకు రూ.10 లక్షల వరకు రుణాలు అందించనున్నట్టు కేంద్రం ప్రకటించింది. దీని కోసం ఏటా లక్ష మంది విద్యార్థులకు ఈ-వోచర్లు అందజేస్తామని వెల్లడించింది.
రుణ మొత్తంలో 3 శాతం వడ్డీ రాయితీ ఇవ్వనున్నట్టు వివరించింది. అయితే, ఉన్నత విద్య చదివే విద్యార్థులకు ఆర్థిక సాయం చేస్తామన్న కేంద్రం.. ఉన్నత విద్యాసంస్థలైన యూనివర్సిటీ గ్రాంట్స్ కమిషన్ (యూజీసీ), ఐఐటీలు, టాప్ బిజినెస్ స్కూల్స్కు ఇచ్చే నిధుల్లో మాత్రం కోత విధించింది.
కిందటేడాది యూజీసీకి రూ. 6,409 కోట్లు కేటాయిస్తే, ఈసారి 60.99 శాతం మేర తగ్గించి కేవలం రూ. 2,500 కోట్లు మాత్రమే విదిలించింది. టాప్ బిజినెస్ స్కూల్స్గా పేరున్న ఐఐఎంలకు (రూ. 212 కోట్లు), ప్రతిష్ఠాత్మక టెక్ సంస్థలు ఐఐటీలకు (రూ. 10,324 కోట్లు) కూడా నిరుడితో పోలిస్తే నిధుల్లో కోత విధించింది.