భోపాల్: ప్రభుత్వ పాఠశాల ఉపాధ్యాయులు ప్రతి రోజూ మద్యం సేవించి వస్తున్నారు. (Drunk Teachers) స్కూళ్లలో మత్తులో జోగుతున్నారు. రెండు మూడు గంటలు ఉండి వెళ్లిపోతున్నారు. దీంతో ప్రభుత్వ స్కూల్స్ విద్యార్థులకు చదువు సాగడం లేదు. బీజేపీ పాలిత మధ్యప్రదేశ్లో ఈ దుస్థితి నెలకొన్నది. గిరిజనులు అధికంగా ఉండే దిండోరి జిల్లాలోని మెహద్వానీ బ్లాక్లో ప్రతి రోజూ 15 మందికిపైగా ఉపాధ్యాయులు మద్యం తాగి ప్రభుత్వ స్కూళ్లకు హాజరవుతున్నారు. విద్యార్థులకు పాఠాలు చెప్పకుండా మత్తులో జోగుతున్నారు. రెండు, మూడు గంటల తర్వాత స్కూల్స్ నుంచి వెళ్లిపోతున్నారు. దీంతో తమ చదువులు సాగడంలేదని విద్యార్థులు వాపోతున్నారు.
కాగా, జిల్లాలోని ప్రభుత్వ స్కూల్స్ టీచర్ల ప్రవర్తనపై బ్లాక్ ఎడ్యుకేషన్ ఆఫీసర్ (బీఈవో) ఒక రిపోర్ట్ను తయారు చేశారు. పలు ప్రభుత్వ పాఠశాలల్లో 15 మంది ఉపాధ్యాయులు తరచూ మద్యం మత్తులో క్లాస్లకు హాజరవుతున్నారని ఆరోపించారు. కొంత మంది టీచర్ల పేర్లు కూడా పేర్కొన్నారు. వీరి వల్ల గిరిజన ప్రభుత్వ స్కూళ్లలో విద్యా వ్యవస్థ గాడి తప్పిందన్నారు. మద్యం సేవించి స్కూళ్లకు వచ్చే ఉపాధ్యాయులపై కఠిన చర్యలు తీసుకోవాలని ఉన్నతాధికారులకు సిఫార్సు చేశారు.