న్యూఢిల్లీ, జూలై 22: రాష్ట్రీయ స్వయం సేవక్ (ఆరెస్సెస్) కార్యక్రమాల్లో ప్రభుత్వ ఉద్యోగులు పాల్గొనటంపై ఉన్న నిషేధాన్ని కేంద్రంలోని ఎన్డీయే ప్రభుత్వం ఎత్తివేసింది. 58 ఏండ్లుగా కొనసాగుతున్న ఈ నిషేధానికి స్వస్తి పలుకుతూ ఆదేశాలు జారీ చేసింది. స్వాతంత్య్రం వచ్చిన తొలినాళ్లలో గాంధీ హత్య సహా పలు కారణాలతో ఆరెస్సెస్ నిషేధాన్ని ఎదుర్కొన్నది.
దీంతో అప్పటి ప్రభుత్వం ప్రభుత్వ ఉద్యోగులు ఆరెస్సెస్లో చేరటాన్ని నిషేధించింది. దాన్ని ఇప్పుడు కేంద్రం ఎత్తివేసింది. కేంద్ర ప్రభుత్వ నిర్ణయాన్ని ఆరెస్సెస్, బీజేపీ స్వాగతించాయి. ఈ నిర్ణయంతో ప్రజాస్వామ్య వ్యవస్థ మరింత పటిష్టం అవుతుందని ఆరెస్సెస్ వ్యాఖ్యానించింది. కాగా, నిషేధం ఎత్తివేతపై కాంగ్రెస్ తీవ్రస్థాయిలో మండిపడింది.