భోపాల్: ఒక స్కూల్ హాస్టల్లో బాలికపై అత్యాచారం (Girl Raped) జరిగింది. బాలికకు డ్రగ్స్ ఇచ్చిన కొందరు వ్యక్తులు ఆమెపై లైంగిక దాడికి పాల్పడినట్లు పోలీసులకు ఫిర్యాదు అందింది. దీంతో సిట్ దర్యాప్తునకు సీఎం ఆదేశించారు. మధ్యప్రదేశ్ రాజధాని భోపాల్లో ఈ సంఘటన జరిగింది. ప్రైవేట్ స్కూల్లో చదువుతున్న 8 ఏళ్ల బాలికపై హాస్టల్లో అత్యాచారం జరిగింది. ఫిర్యాదు అందుకున్న పోలీసులు ముగ్గురు వ్యక్తులపై కేసు నమోదు చేశారు. నిందితులను గుర్తించేందుకు ప్రయత్నిస్తున్నట్లు పోలీస్ అధికారి తెలిపారు. బాధితురాలికి వైద్య పరీక్షలు నిర్వహించిన తర్వాత ఆమె వాంగ్మూలాన్ని రికార్డ్ చేస్తామని చెప్పారు. బాలికకు డ్రగ్స్ ఇచ్చి లైంగిక దాడికి పాల్పడినట్లుగా వచ్చిన ఆరోపణలపై దర్యాప్తు చేస్తున్నట్లు వెల్లడించారు.
కాగా, మధ్యప్రదేశ్ ముఖ్యమంత్రి మోహన్ యాదవ్ ఈ సంఘటనపై స్పందించారు. ఈ కేసుపై దర్యాప్తు చేయాలని ప్రత్యేక దర్యాప్తు బృందాన్ని (సిట్) ఆదేశించారు. ఈ నేపథ్యంలో ఆధారాల సేకరణ, నిందితుల గుర్తింపు కోసం పోలీస్ బృందాలను ఏర్పాటు చేశారు.